Маск во саботата објави формирање на Партија Америка како одговор на законот за намалување на даноците и трошоците предложен од Трамп, за кој милијардерот тврди дека ќе ја доведе земјата до банкрот
Американскиот претседател Доналд Трамп ги оцени плановите на Илон Маск за формирање нова политичка партија како смешни и додаде дека Америка функционира најдобро во рамките на двопартиски систем.
Еден ден откако Маск го ескалира конфликтот со Трамп објавувајќи дека ќе создаде нова партија, новинарите го прашаа американскиот претседател за коментар пред неговото заминување од Мористаун, Њу Џерси, каде што беше во посета на локален голф-клуб.
„Мислам дека е смешно да се создава трета партија. Имаме огромен успех со Републиканската партија. демократите ја изгубија насоката, но секогаш постоел двопартиски систем, и создавањето трета партија само предизвикува конфузија. Системот е создаден за две партии. Третите партии никогаш не функционирале, па Маск може да се забавува со тоа, но мислам дека е смешно“,
рече Трамп.
Маск во саботата објави формирање на Партија Америка како одговор на законот за намалување на даноците и трошоците предложен од Трамп, за кој милијардерот тврди дека ќе ја доведе земјата до банкрот. Маск, кој беше главен советник на Трамп за реформи во федералната влада на почетокот на неговиот мандат, изјави дека неговата партија ќе се обиде да ги отстрани републиканските конгресмени кои го поддржаа законот, наречен „Големиот прекрасен закон“, на идните избори.
Министерот за финансии Скот Бесент, за Си-ен-ен изјави дека управните одбори на компаниите на Маск, „Тесла“ и „Спејс икс“, веројатно би сакале тој да се фокусира на бизнисот, а не на политиката.
„Претпоставувам дека одборите не беа задоволни од вчерашното соопштение и ќе го охрабрат да се концентрира на бизнисот“,
рече Бесент.
Маск потроши стотици милиони долари за поддршка на кампањата за реизбор на Трамп во 2024 година, често појавувајќи се покрај него во Белата куќа, но несогласувањата околу законот за трошоците доведоа до разидување.
Законот, со кој се намалуваат даноци и се зголемуваат трошоците за одбрана и гранична безбедност, беше усвоен минатата недела во Конгресот, но критичарите тврдат дека тој ќе го зголеми буџетскиот дефицит.
Трамп изјави дека Маск е незадоволен поради укинувањето на даночните олеснувања за електричните возила на „Тесла“, а во одговор на критиките се закани дека ќе ги укине државните договори и субвенции за „Тесла“ и „Спејс икс“.