Портпаролката на опозициската партија и денеска, како и на претходните прес-конференции од серијалот „Вистината за Кочани“, наведе имиња на високи полициски функционери кои, како што кажа, иако имаат директна вина за трагедијата, се заштитени од власта предводена од ВМРО-ДПМНЕ
Опозицискиот Социјалдемократски сојуз на Македонија (СДСМ) и денеска излезе со обвинувања до власта на ВМРО-ДПМНЕ дека и понатаму штити полициски службеници, кои според опозицијата имаат директна вина за пожарот во т.н. кабаре „Пулс“ во кој загинаа 62 лица, а речиси 200 беа повредени.
Ваквите тврдења опозициската партија ги изнесува изминатите неколку дена на серија прес-конференции насловени „Вистината за Кочани“, а денеска сомневањата на СДСМ дека истрагата за трагедијата се води селективно и остава неодговорени голем број прашања ги соопшти портпаролката Богданка Кузеска.
Во таа насока Кузеска ги прозва премиерот Христијан Мицкоски, министерот за внатрешни работи Панче Тошковски, но и државниот јавен обвинител Љупчо Коцевски, кои, како што рече, прават сè за да ги прикријат трагите и непосредната одговорност на оние кои кобната вечер донеле одлука да ги затворат вратите на т.н. кабаре, со што непосредно придонеле да има толкав број жртви од трагедијата.
„Власта се обидува да ги заштити и оние кои биле должни да ја затворат дискотеката која кобната вечер работела без никаков документ во целост надвор од законските рамки и прописи и покрај фактот што јавно било објавено дека таа вечер во овој објект се организира забава. Не само што власта на Мицкоски ги штити полициските службеници кои се срам за униформата, туку и одбива да одговори на конкретни прашања на медиумите поврзани со оперативниот план таа вечер“,
рече Кузеска на прес-конференцијата.
Во таа насока од СДСМ прашуваат како е можно и од кои причини оперативниот план за акциската контрола на повеќе локали низ Македонија, меѓу кои и во „Пулс“, да биде класифицирана информација, три месеци по спроведувањето на акцијата.
Според опозициската партија, Министерството за внатрешни работи крие и кои биле оперативните процедури што ги наложувала оперативната акција, односно кој ја дал наредбата да бидат затворени вратите на објектот.
„Власта крие и кој ја дал наредбата да се спроведе акциска контрола во објект кој не смеел да биде отворен таа вечер затоа што немал никаква дозвола за работа, акциска контрола во која еден полициски службеник го загуби својот живот. Дали власта го штити началникот на СВР Штип, Дејан Салтировски, и дали тој ја дал наредбата да се прави акциска контрола на објект кој воопшто таа вечер не смеел да работи? Дали власта го штити Салтировски, чиј адвокат бил лично министерот Тошковски? Дали Мицкоски го штити Салтировски затоа што е во кумовски врски со Орце Тодоровски-Ефто, кој е бизнис-партнер во хидроцентралите на Мицкоски? Дали МВР ги класифицирале овие документи затоа што потпис и наредба да се затворат вратите на дискотеката ‘Пулс’ спротивно на стандардните оперативни процедури при акциска контрола ставил токму Салтировски?“,
прашуваат од СДСМ.
Одговорност, како што кажа денеска Кузеска, нема ниту за Драган Казак Петрушев, кој, според Кузеска, спровел наредба спротивна на стандардната оперативна процедура и ги затворил вратите на т.н. кабаре.
„Нема одговорност ниту за началничката на економски криминал Кристина Јованова која дозволила да организира забави со стотици присутни, фирма со блокирана сметка повеќе од 200 дена која не можела да исплаќа плати и обврски кон добавувачи. Јованова не само што дозволила фирмата да работи во целост на црно со исплати во кеш без фискални сметки, туку и самата редовно ја посетувала истата. Нема одговорност ниту за Томо Донев кој е началник на криминалистичката полиција во Кочани во моментот кога се случува пожарот во дискотеката Пулс. Како е можно Донев да не знае дека редовно во единствената дискотека во градот се употребува пиротехника и да не постапи согласно Закон и да побара лиценца за истата?“,
кажа Кузеска.
Како што рече таа, трагедијата во Кочани е масовно убиство со потпис на државата, односно на власта која, според СДСМ, прави сè за да се спаси од одговорност за смртта на 62 млади луѓе.
Кузеска на крајот од денешното обраќање упати редица прашања кои се однесуваат на употребата на пиротехника во објектот кобната вечер, меѓу кои и зошто нема одговорност за инспекторите надлежни за надзор на пиротехниката.
„Обвинителството констатирало во истрагата дека ММММ ДООЕЛ немало дозвола за употреба на пиротехника, ниту имало лице со дозвола за ракување на пиротехника, зошто нема одговорност за инспекторите надлежни за надзор на пиротехниката? Зошто се крие името на фирмата која на црно увезувала пиротехнички средства? Дали се крие кој се потпишал на оперативната наредба спротивна на стандардните оперативни процедури со што било наредено да се затворат вратите? Дали се работело спротивно на стандардни оперативни процедури? Зошто се крие името на фирмата која на црно увезувала пиротехнички средства? Дали се крие кој се потпишал на оперативната наредба спротивна на стандардните оперативни процедури со што било наредено да се затворат вратите? Дали се работело спротивно на стандардни оперативни процедури?“,
праша Кузеска, додавајќи дека СДСМ нема да дозволи некој да ја заташка истрагата за трагедијата во „Пулс“ и ќе продолжи со прес-конференциите.
Одговарајќи на новинарско прашање, Кузеска како лицемерие, нечовечност и ароганција ја оцени денешната трибина во Владата насловена „Кочани е наш приоритет“.
„Кочани не е приоритет за Владата. Владата го одби Законот за помош на семејствата на жртвите и повредените од трагедијата. Буквално одби финансиски да им помогне додека родители даваат откази од работа за да се грижат за повредените деца. Пратениците на ДПМНЕ се сокрија во канцелариите на Собранието да не излезат да се соочат со родителите од срам. Кукавици и лицемери“,
рече таа.
Таа му порача на директорот на Фондот за здравствено осигурување (ФЗО), Сашо Клековски, дека треба да се сокрие од јавноста бидејќи болницата во Кочани нема основни медицински средства, физикална терапија се прави на донирани маси, а не се обезбедени ниту обични креми за раните на повредните.