Од ДУИ изразија загриженост за, како што велат, алармантната ситуација во Чаир, каде што според Град Скопје во последните две години се изградени над 150 дивоградби
Демократската унија за интеграција (ДУИ) бара надлежните да преземат мерки за да ја истражат и сопрат појавата за која минатата недела алармираше градоначалничката на Скопје, Данела Арсовска, а се однесува на бесправно изградените објекти во скопски Чаир. Од ДУИ изразија загриженост за, како што велат, алармантната ситуација во Чаир, каде што според Град Скопје во последните две години се изградени над 150 дивоградби.
„Снимките што ги објави градоначалничката на Скопје, кои прикажуваат градби покрај училишта, приватни куќи и тесни улички во старите маала, се потресен доказ за еден хаос кој е или поддржан или толериран од институциите. Денешниот Чаир изгледа како мозаик од случајни градби – без план, без логика, и пред сè, без никаква грижа за јавната безбедност. Отворање темели без заштита, високи згради кои го блокираат светлото на еднокатните куќи, објекти до училишни дворови што го загрозуваат животот на децата, ова е сликата на реалноста што бара итен одговор“,
велат од ДУИ.
Опозициската партија обвини дека надлежните не реагираат за ваквата состојба оценувајќи дека институционалната неактивност е директен неуспех на системот, а нереагирањето е дел од проблемот. Државниот молк, велат од ДУИ, не смее да биде штит за оние што систематски го уништуваат животниот простор во Чаир.
„Ова не е само урбанистички проблем, ова е криза на јавната безбедност и на граѓанското достоинство. ДУИ цврсто стои на страната на жителите на Чаир и бара враќање на законитоста, институционалната одговорност и почитувањето на секојдневниот живот на луѓето кои заслужуваат да живеат во безбедна и достоинствена средина“,
додаваат од партијата.
Реакцијата на ДУИ следува откако градоначалничката на Скопје, Данела Арсовска, минатата недела изврши обиколка на неколку локации низ Општина Чаир каде што се извршуваат градежни активности, за кои рече дека се дивоградби. Од градилиштата таа двапати се вклучи во живо на својот фејсбук-профил.