Апсењето на полицаецот се случи пет дена по смртта на Афроамериканецот Џорџ Флојд
Полицаецот кој со колена го приклешти Афроамериканецот Џорџ Флојд, легнат и во лисици, по што задржаниот почина на место, е уапсен, јави Си-ен-ен.
Апсењето на полицаецот се случи пет дена по убиството на Флојд.
Во последните 48 часа, делови од јужен Минеаполис поминаа низ анархија. Запалени се и вандализирани многу продавници и објекти, а вчера беше запалена и полициската станица. Протестантите денеска на некои места употребуваа и молотови коктели, додека илјадници гневни граѓани дивееја, ограбуваа продавници и запалија повеќе автомобили и објекти во градот.
На помош на полицијата во Минеаполис денеска дојде и Националната гарда на САД.
По апсењето на полицаецот, Дерек Чавин, демонстрантите и граѓанските групи бараат задржување и на тројцата преостанати службеници кои го осигуруваа местото и не сторија ништо да се спречи убиството.
Властите во Минеаполис изјавија дека судењето на Чавин ќе биде „брзо и праведно“.
Задржувањето и убиството на невооружениот Афроамериканец Џорџ Флојд е документирано на камера.
Луѓето кои снимаат протестираат полицаецот да го тргне коленото од вратот на легнатиот задржан, бидејќи овој може да се задуши. Во таква положба, со приклештен врат, полицаецот со едното колено го држи задржаниот повеќе од седум минути. Од снимката се гледа и слуша како Флојд, легнат на земја и со лисици на рацете, моли за помош и повторува дека не може да дише.
Џорџ Флојд (46) после неколку минути почина.
Денеска протести имаше и во други градови низ САД, какo Њујорк, каде што полицијата се судри со толпа од над илјада луѓа на плоштадот„ Јунион“.