За избор на папа е потребно двотретинско мнозинство, или 89 гласови. Белиот чад од оџакот е сигнал за католичките верници дека е избран нов црковен водач
Најголемата конклава во историјата на Римокатоличката црква треба да продолжи денеска, кога се очекуваат да се одржат четири круга гласање, откако вчера не беше избран нов папа, како што и се очекуваше по првиот круг гласање, пренесе ХРТ.
Папата Франциск, кој почина во април, беше избран на крајот од вториот ден, по пет круга гласање, потсетува хрватскиот национален сервис. Осум години претходно, беа потребни два дена за да биде избран и прогласен папата Бенедикт Шеснаесетти.
Вчера попладне кардиналите ја почнаа процедурата за изборот на нов водач за 1,4 милијарди католици во светот. Синоќа, од специјално инсталираниот оџак на Сикстинската капела, кој се гледа од плоштадот „Свети Петар“ во Ватикан, се издигна црн чад, сигнализирајќи дека не е избран нов папа.
За избор на папа е потребно двотретинско мнозинство, или 89 гласови. Белиот чад од оџакот е сигнал за католичките верници дека е избран нов црковен водач.
На конклавата во Ватикан учествуваат рекордни 133 кардинали од 70 земји кои за својот фаворит се изјаснуваат со тајно гласање. На претходната конклава во 2023 година, кога беше избран Франциск, учествуваа 115 кардинали од 48 земји.
Зголемувањето на бројот на кардинали се оценува како одраз на напорите на покојниот папа да го прошири досегот на Римокатоличката цркца за време на неговиот 12-годишен понтификат.
Јасни фаворити за нов папа нема, иако италијанскиот кардинал Пјетро Паролин и филипинскиот кардинал Луис Антонио Тагле се сметаат за водечки кандидати. Паролин служеше како државен секретар, втора највисока позиција во Ватикан, за време на речиси целиот понтификат на Франциск.
Неговата улога и умерените ставови за многу општествени прашања сугерираат дека, доколку биде избран за папа, тој ќе ги продолжи политиките на својот претходник. Во исто време, изворите тврдат дека тој би можел биде лидерот кој ќе ги помири различните фракции во Црквата.
Фаворитот за нов папа од Азија, филипинскиот кардинал Луис Антонио Тагле, е харизматичен умерен човек кој често се нарекува „Франциск од Азија“. Шеесет и седумгодишниот Тагле, кој со Франциск споделува историја на застапување на сиромашните, мигрантите и другите маргинализирани групи, е познат по својот мисионерски дух и пастирски фокус.
Доколку стане јасно дека ниту еден кандидат не може да го освои потребното двотретинско мнозинство, се очекува гласовите да се префрлат на други кандидати, при што гласачите потенцијално ќе ги обединат своите гласови врз основа на географија, доктринарни афинитети или заеднички јазик.
Други потенцијални кандидати за папа се Французинот Жан-Марк Авелин, Унгарецот Питер Ердо, Американецот Роберт Превост и Италијанецот Пјербатиста Пицабала. За време на конклавата, кардиналите се изолирани од надворешниот светот. По релативно либералниот понтификат на папата Франциск, обележан со поделби меѓу традиционалистите и оние кои се залагаат за полиберален модерен пристап, беа понудени различни проценки за тоа што тие очекуваат од следниот папа.
Некои посакуваат новиот папа да продолжи со континуитетот на визијата на Франциск, која се карактеризира со поголема отвореност и реформи, додека други копнеат по враќање кон традицијата.