Според американскиот државен секретар, САД не може да продолжи да одвојува време и ресурси ако Украина и Русија не постигнат договор
Американскиот државен секретар Марко Рубио изјави дека следната недела е клучна во преговарачкиот процес меѓу Украина и Русија и дека од тоа ќе зависи одлуката на САД дали ќе продолжат да посредуваат во напорите за ставање крај на војната.
Според Рубио, САД не може да продолжи да одвојува време и ресурси ако Киев и Москва не постигнат договор.
„Ова ќе биде навистина важна недела во која ќе мора да одлучиме дали сакаме да продолжиме да вложуваме напор или е време да го насочиме нашиот фокус кон други прашања кои се исто толку, ако не и повеќе важни“,
изјави Рубио за Ен-би-си Њуз.
Државниот секретар на САД рече дека изгледите за постигнување мировен договор се поблиски од кога било во последните три години, но дека сè уште не е постигнат конечен договор.
На прашањето колку време е подготвен американскиот претседател Доналд Трамп да им даде на Украина и Русија да постигнат договор, Рубио одби да даде конкретен рок. Додаде дека и покрај тоа што постојат причини за оптимизам, важно е да се остане реален во врска со ситуацијата.