Како што дознава „360 степени“, до информациите се стигнало преку вештачење на телефоните на дел од обвинетите во случајот „Адитив“
Актуелната претседателка на Државната комисија за спречување на корупција (ДКСК), Татјана Димитровска, се наоѓа во Основниот кривичен суд во Скопје, како осомничена во истрага за случајот „Адитив“.
Од Основното јавно обвинителство за гонење организиран криминал и корупција (ОЈО ГОКК) попладнево информираа дека во рамките на предметот „Адитив“, од прибраните докази, е донесена наредба за спроведување истрага за уште три лица.
Од Обвинителството не го откриваат идентитетот на тројцата осомничени, но дознаваме дека меѓу нив е и претседателката на Антикорупциска.
Како што дознава „360 степени“, таа е осомничена за кривичното дело оддавање службена тајна, а наводно до информациите се стигнало преку вештачење на телефоните на дел од обвинетите во случајот „Адитив“.
За осомничените се бараат и мерки за обезбедување присуство.
Конкретно за Димитровска, Обвинителството не бара притвор, туку мерки за претпазливост, велат информациите од Судот.
Според нив, таа се наоѓа во судот, но сè уште не е изведена пред судија на претходна постапка, бидејќи и натаму траат распитите на осомничените за случајот со криминалот со туѓа нега и инвалидски пензии.
Од ОЈО ГОКК, за проширувањето на предметот „Адитив“ со Димитровска и уште двајца осомничени, повеќе детали најавуваат за утре.
Инаку, по тримесечна истрага, ОЈО ГОКК на 27 февруари до Основниот кривичен суд Скопје поднесе обвинителен акт за случајот „Адитив“ кој се однесува на криминал во државната компанија „Електрани на Северна Македонија“ (ЕСМ), тежок 6,5 милиони евра.
Со обвинителниот акт се опфатени вкупно 31 лице, кои се товарат за повеќе кривични дела.
Истрагата за случајот „Адитив“ беше отворена на 10 декември лани по опсежна акција на полицијата и Обвинителството за гонење организиран криминал и корупција.
Меѓу обвинетите во предметот се и ексдиректорот на ЕСМ, Васко Стефанов, како и неговиот претходник на функцијата, Васко Ковачевски, кој се наоѓа надвор од државата и по кого е распишана меѓународна потерница. Обвинет е и поранешниот директор на ТЕЦ „Неготино“, Небојша Стојановиќ.