Дополнително, Обвинителството бара Основниот кривичен суд на Јахоски да му одреди мерки на претпазливост кои вклучуваат забрана за напуштање на живеалиштето, привремено одземање патна или друга исправа за напуштање на државата и повремено јавување кај службено лице или надлежен државен орган
Сопственикот на компанијата „Пуцко петрол“, Асмир Јахоски, предлага замена на мерката притвор која му е одредена во рамки на истрагата за набавка на мазут во ТЕЦ „Неготино“ за мерка гаранција во недвижен имот со проценета вредност од 60 672 235 денари, односно 986 191 евра.
Основното јавно обвинителство за гонење организиран криминал и корупција (ОЈО ГОКК), кое го води предметот, соопшти дека предлогот на осомничениот може да биде основан само ако тој во исто време на посебна сметка на судот дополнително депонира износ од 72 000 000 денари (1 170 318 евра).
„Во конкретниот предмет, според доказите со кои располага Обвинителството, износот од 72 000 000 денари одговара на вкупниот износ на противправно стекнатата имотна корист за овој осомничен од кој во понатамошна постапка би можело да се наплати евентуалното отштетно побарување од него“,
наведуваат од ОЈО ГОКК.
Дополнително, Обвинителството бара Основниот кривичен суд на Јахоски да му одреди мерки на претпазливост кои вклучуваат забрана за напуштање на живеалиштето, привремено одземање на патна или друга исправа за напуштање на државата и повремено јавување кај службено лице или надлежен државен орган.
Во образложението на доставеното мислење од страна на ОЈО ГОКК оттаму наведуваат дека обвинителот ги имал предвид списите во предметот и фактот што Обвинителството ги обезбедило поголемиот дел од материјалните и вербалните докази, со што се намалува ризикот од нивно сокривање, фалсификување или уништување на трагите на кривичното дело ниту, пак, дека попречување на кривичната постапка со влијание на сведоци.
„Согласно даденото мислење, само со определување на сите погоре наведени мерки обвинителството ќе смета дека се исполнети условите за укинување на претходно изречената мерка притвор“,
наведуваат од ОЈО ГОКК.
Инаку, за кривичното дело перење пари кое му се става на товар на сопственикот на „Пуцко петрол“, мерката притвор може да биде продолжена само за уште 30 дена, по што тој, согласно законските одредби, би бил пуштен да се брани од слобода.
Во акцијата на ОЈО ГОКК за набавката на мазут во ТЕЦ „Неготино“ освен Јахоски беа приведени уште 10 други лица меѓу кои и Ратко Капушевски, генерален директор на фирмата РКМ за трговија со енергенти и нафтени деривати.