Министерот за одбрана Израел Кац рече дека ова ќе бидат „тампон-зони“ што ќе служат за заштита на израелските заедници „во која било привремена или трајна ситуација“
Израелскиот министер за одбрана изјави дека дури и по завршувањето на војната, армијата ќе остане во таканаречените „безбедносни зони“ што беа воспоставени со окупирање на големи области на Газа, објави Би-би-си.
Израел Кац рече дека ова ќе бидат „тампон-зони“ што ќе служат за заштита на израелските заедници „во која било привремена или трајна ситуација“.
Тој додаде дека десетици проценти од палестинската територија се додадени откако израелската офанзива продолжи пред три недели.
„Приближно 30 проценти од територијата на Газа сега е означена како безбедна зона“,
се вели во соопштението на војската.
Кац рече дека Израел ќе ја продолжи шестнеделната блокада на хуманитарната помош за да изврши притисок врз Хамас да ги ослободи заложниците, и покрај предупредувањето на ОН за „страшни“ последици.
„Лекари без граници“ (МСФ) денеска предупредија дека Газа е претворена во „масовна гробница за Палестинците и оние што им доаѓаат на помош“.
„Во реално време сме сведоци на уништување и присилно раселување на целото население во Газа“,
изјави Аманда Базерол, координаторка за хуманитарни прашања во Газа.
ОН: Од 18 март раселени околу половина милион Палестинци
Околу 500 000 Палестинци се раселени од Појасот Газа од крајот на примирјето кога Израел ги продолжи воените операции на 18 март, изјави Стефани Тремблеј, портпаролка на генералниот секретар на Обединетите нации.
„Хуманитарните организации кои соработуваат со ОН проценуваат дека од 18 март приближно половина милион луѓе се раселени“,
рече Тремблеј.
Таа додаде дека пред крајот на примирјето повеќе од два милиони луѓе веќе беа раселени од областа Газа.