Муцунски му се заблагодарил на Герапетритис за навремената и висококвалитетна медицинска помош што Грција ја обезбеди за дел од повредените во пожарот во Кочани, за што посочи дека е одраз на искрено пријателство меѓу две соседни земји
Министерот за надворешни работи и надворешна трговија Тимчо Муцунски денеска оствари средба со неговиот колега, шефот на грчката дипломатија Јоргос Герапетритис на маргините на „Делфи економскиот форум“ во Грција.
Информацијата за средбата ја сподели Муцунски на својот фејсбук-профил, објавувајќи и фотографија од разговорот со Герапетритис.
„Средбата претставува важен чекор напред во зајакнувањето на регионалната соработка и значително унапредување на заемните дипломатски односи“,
пишува министерот на Фејсбук.
Двајцата, како што вели Муцунски, ја нагласиле и заедничката подготвеност и потребата од понатамошно унапредување на билатералната соработка, преку политички дијалог, приоритетно поврзување во сферата на инсфраструктурата и енергетиката, како и нова динамика во економијата, културата и туризмот.
Муцунски му се заблагодарил на Герапетритис за навремената и висококвалитетна медицинска помош што Грција ја обезбеди за дел од повредените во пожарот во Кочани, за што посочи дека е одраз на искрено пријателство меѓу две соседни земји.
Инаку, Муцунски денеска и утре учествува на 10. издание на „Делфи економскиот форум“, што оваа година се одржува од 9 до 12 април во градот Делфи во Грција.
Министерот, во рамките на форумот, ќе се обрати на пленарна сесија на тема „Дали ЕУ–САД алијансата е надвор од поправка“.