Објектите кај кои ќе се утврди недоследност ќе имаат рок да ја отстранат, вели Перински за најавениот мораториум

Тој рече дека станува збор за широка акција која се изведува и на локално и на централно ниво и оти треба да се почека исходот од неа, па потоа да се носат заклучоци

Министерот за локална самоуправа Златко Перински, како и премиерот Христијан Мицкоски најави дека покрај за угостителските објекти, мораториум ќе има и за јавните установи.

Според Перински, на оние објекти каде ќе се увиди дека има некоја недоследност ќе им се даде рок таа да биде отстранета, а во случај тоа да не се направи тогаш, како што вели, нема да можат да работат.

„Се прават проверки не само на јавните објекти, туку и на сите оние угостителски и на станбените блокови. Оние објекти каде ќе се увиди дека има некоја недоследност ќе им се даде рок на истите да ја отстранат за да може да биде гарантирана безбедноста на сите корисници. Важно е да превенираме се што може во иднина да се случи. Доколку објектите не ја отстранат таа аномалија во догледен период секако дека нема да можат и нема да имаат услови да работат и мислам дека во тој период ќе бидат затворени“,

рече Перински денеска дообјаснувајќи ја вчерашната изјава на премиерот.

Тој рече дека станува збор за широка акција која се изведува и на локално и на централно ниво и оти треба да се почека исходот од неа, па потоа да се носат заклучоци.

„Ова е широка акција која се изведува и на локално и на централно ниво и треба да почекаме да ги видиме исходот, да видиме со што ќе се соочиме и потоа да носиме мерки и заклучоци. Дајте ни време и на нас како централна власт, но и на локалните власти да видиме со кои предизвици ќе се соочиме, на што ќе наидеме и потоа ќе носиме заклучоци. Секако ќе бидат во насока и корист на граѓаните“,

додаде Перински во одговор на новинарско прашање при денешниот увид на градежните работи во Кучково, Скопско, каде што објект на основно училиште се преадаптира во Регионален центар за рехабилитација на деца кои се излекувани од канцер.

Премиерот Христијан Мицкоски вчера најави дека мораториум е временски период кој ќе им биде даден на сопствениците на локалите да ги отстранат недостатоците или да направат нешто со што ќе се приспособат и оти во тој период нема да работат.

Покрај приватни има и државни објекти што за време на мораториумот ќе треба да ги отстранат неправилностите, вели Мицкоски

Според него, не станува збор само за приватни објекти, туку има и државни објекти.

Најави дека временскиот период што ќе им се даде на сопствениците на локалите ќе биде долг колку што е потребно.

Инспекциските контроли во угостителските објекти следат по пожарот во таканаречената дискотеката во Кочани на 16 март, во кој загинаа 59 лица, а се повредени повеќе од 150 лица.