Обвинетиот Видевски на претходното рочиште негираше каква било поврзаност со двата грозоморни настани, што според Обвинителството се разликува од она што го кажал за време на истражната постапка
Со читање на исказите што третообвинетиот Боре Видевски ги дал во истрага денеска во Основниот кривичен суд Скопје треба да продолжи судењето на петтемина обвинети за грабнувањата и убиствата на Вања Ѓорчевска и Панче Жежовски.
Исказите на Видевски од истрагата ќе се читаат на барање на Обвинителството откако тој на минатото рочиште, давајќи исказ пред судот, негираше какво било вмешаност во грабнувањата и убиствата.
Обвинителките Жаклина Крстевска-Јосифовска и Ана Стојковиќ-Димитриевска посочија дека оваа околност, односно дадениот исказ на Видевски се разликува од она што претходно го кажал за време на истражната постапка.
Обвинетиот Видевски на пултот за сведоци застана на рочиштето во понеделникот и негираше каква било вмешаност во двата грозоморни настани.
Неговиот исказ следуваше по долгиот распит на Велибор Манев пред судот, кој траеше три рочишта и на кои изнесе детали за грабнувањата и убиствата, напоменувајќи ја и улогата на Видевски во нив.
Од друга страна, Видевски одговарајќи на директни прашања на неговиот адвокат, рече дека со Велибор Манев се знаеле одамна, а комуникацијата се интензивирала откако се приклучил на партијата Десна. Тогаш ги запознал и другите. На прашање каде бил деновите 21, 22 (кога е убиен Жежовски) и 23 ноември 2023 година, Видевски одговори – на работа.
За кажаното во истрага, рече дека бил конструиран од полицијата, која го тепала во полициска станица за да ја потпише, како што кажа изјавата, што претходно била напишана.
На рочиштето тој сподели детали за тоа како бил тепан во полициската станица за да го признае делото.
По директното испрашување на неговиот адвокат, тој одговараше на вкрстени прашања на обвинителките Жаклина Крстевска-Јосифовска и Ана Стојковиќ-Димитровска. На прашањата на обвинителките дека тој воопшто не се пожалил дека бил тепан, Видевски рече дека тоа било од страв. Прашан дали е точно дека од оружјето што го поседува недостига само пиштолот, рече дека било набавено во време кога било престиж да се поседува. Рече дека има аверзија кон оружје. За пиштолот кажа дека не знае каде е, можеби е преместен одамна. Рече дека тоа не значи дека направил нешто лошо.
Неговиот бранител, Бојан Манев по рочиштето во понеделникот кажа дека постојат докази дека обвинетиот Видевски за време на критичниот период во кој се случуваат убиствата на Панче Жежовски и Вања Ѓорчевска бил на работа и тој исказ е даден во Обвинителството уште на 21 декември 2023 година.
Во врска со сведочењето на обвинетиот Велибор Манев, кој ги призна делата и го посочи Боре Видевски како еден од сторителите, бранителот на Видевски рече дека тоа го знае уште од почетокот на судската расправа бидејќи, како што рече, како адвокат имал увид во исказите.
Рече дека не би го коментирал неговиот исказ бидејќи на крајот ќе има соочување, но додаде оти смета дека Велибор Манев не ја зборува вистината.
По сослушувањето на Манев и Видевски, според најавенот, ќе бидат сослушани и обвинетите Влатко Кешишев, Александар Ѓорчевски и на крај Љупчо Палевски.
Според обвинението, Палевски, Видевски, Манев, Кешишов и Ѓорчевски, се обвинети дека заедно испланирале грабнување на 14-годишната Вања со цел да присилат член на нејзиното потесно семејство да даде парични средства за откуп. Грабнувањето на оштетениот Панче Жежовски во Велес, пак, според обвинението, било со намера да го присилат да им го даде сопственото возило „ситроен“ за да го користат за грабнување на детето во Скопје.
Малолетната Вања и велешанецот Панче, кои беа пријавени за исчезнати на 27 и 24 ноември, беа пронајдени мртви во близина на Скопје и Велес на 3 декември 2023 година.