Што се однесува до критиките во јавноста дека во Македонија нема центар за изгореници, министерот посочи дека и да има таков центар, тој не би можел да ги згрижи сите повредени, туку само неколку. Затоа, вели Таравари, и странските држави примаат од 4 до 6 пациенти, бидејќи никој нема капацитет да третира одеднаш толку пациенти со вакви повреди
Сите повредени пациенти се во стабилна состојба, нема нови починати. Денеска има двајца нови пациенти кои вчера не се јавиле за помош. Сите пациенти од Штип и од Кочани се префрлени во Скопје, информираше денеска на прес-конференција министерот за здравство Арбен Таравари.
„Сите пациенти се во стабилна состојба, и тие што се надвор од државата, 51, главно се во стабилна состојба. Има пациенти и денеска што се јавуваат во болница. Сите кои не се пријавиле вчера, нека се пријават денеска. На скопските клиники згрижени се 49 повредени, во ГОБ „8 Септември“ има 18 пациенти, во стара Градска болница се 17 пациенти, во Штип сега се пријавени двајца нови пациенти. Во Турција се 9 пациенти, во Бугарија 14 и во Грција 5, во Србија 17 пациенти. Во Будимпешта се испратени двајца и во Литванија 4 пациенти. Денеска очекуваме уште неколку пациенти да бидат испратени надвор од државата, во Хрватска, Словенија, Австрија и 12 пациенти во Белград, во ВМА“,
рече Таравари.
Тој напомена дека сите 20 критични пациенти кои се надвор од државата се релативно стабилни и оти засега нема промена во нивната состојба.
Таравари најави дека можни компликации се очекуваат денеска и утре бидејќи следи инфективната фаза кај пациентите со тешки изгореници.
Што се однесува до критиките во јавноста дека во Македонија нема центар за изгореници, министерот посочи дека и да има таков центар, тој не би можел да ги згрижи сите повредени, туку само неколку.
Затоа, вели Таравари, и странските држави примаат од 4 до 6 пациенти, бидејќи никој нема капацитет да третира одеднаш толку пациенти со вакви повреди.
Во однос на лекарите од странство, Таравари рече дека се пристигнати околу 15 лекари од Чешка и Србија и уште неколку треба да стигнат од Израел. Станува збор за воени доктори кои имаат искуства со третирање на тешки изгореници и тие ќе бидат распоредени во болниците за да им помагаат на македонските колеги.
Во Македонија се лекуваат 84 пациенти, а во странство има 51 пациент, вкупно повредени се 135 пациенти.