Посочи дека понудената цена за паркирање е 50 денари од час, која според него е пристојна, имајќи предвид како се движат цените за паркинг во Скопје
Договорот со компанијата „Ѓока констракшн“, која преку јавно-приватно партнерство треба да стопанисува со паркингот на Клиничкиот центар во Скопје, ќе биде потпишан доколку по првичната процедура помине уште неколку филтри. Ова денеска на прес-конференција го рече министерот за здравство Арбен Таравари одговарајќи на новинарско прашање дали е потпишан договор со албанската компанија „Ѓока констракшн“, која е избрана на тендерот за да стопанисува со паркингот на Клиничкиот центар „Мајка Тереза“ во Скопје.
Сепак, поради реакциите од јавноста, но и ако има укажувања од Владата за пропусти, посочи дека е подготвен да го поништи тендерот.
„Договорот не е потпишан. Паркингот на Клиничкиот центар секогаш прави нервоза. Секогаш ми значи мислењето на јавноста, таа што ќе каже, ако ми кажат дека не е нешто во ред, но и ако од Влада кажат дека има одредени пропусти, нема да имаме ништо. Ќе го поништиме тендерот, ќе објавиме нов, но само ќе изгубиме една година“,
рече Таравари на прес-конференција од посетата на Клиниката за инфективни болести.
Додаде дека тој како министер не може да го разгледува секое портфолио на секоја компанија што ќе се пријави на објавените тендери од Министерството за здравство ниту, пак, да ја оценува успешноста на таа фирма.
Во однос на рокот за стопанисување со паркингот, Таравари рече дека тоа не е 20 години, како што е предвидено со физибилити студијата, туку во тендерот има услов за понудувачот да го користи паркингот додека на таа локација е Клиничкиот центар, а тоа, според него, нема да биде повеќе од седум до 10 години.
„Таков услов сме поставиле, додека е тука Клиничкиот центар, а тоа нема да биде повеќе од 10 години. Затоа и интересот на компаниите беше мал. Да беше за 20 години сигурно дека интересот ќе беше поголем. Од проектната единица ме известија дека процедурата на тендерот е помината, но дека има уште одредени филтри кои треба да поминат во Владата. Ако поминат добро, ако не, пак ќе го објавиме тендерот“,
вели министерот.
Посочи дека понудената цена за паркирање е 50 денари од час, која според него е пристојна, имајќи предвид како се движат цените за паркинг во Скопје.
„Најдобро е цената за паркинг да биде 0 денари. Но, ако најдете таков понудувач кој нема да наплаќа ништо, би било идеално“,
кажа тој.
Доколку договорот се потпише, рокот за изградба на монтажните катни гаражи на Клинички е шест месеци до една година.
Дека компанијата „Ѓока констракшн“ од Албанија преку јавно-приватно партнерство ќе стопанисува со паркингот на Клиничкиот центар „Мајка Тереза“, Таравари претходно потврди за БИРН.
На огласот, кој беше распишан на 15 ноември, се јавила само „Ѓока констракшн“. Компанијата е формирана во Тирана во 1994 година, од 2022 има регистрирано подружница и во Скопје.
Како што објави „360 степени“, во огласот се превидува приватниот партнер да изгради две катни монтажни гаражи, да стопанисува со целиот паркинг на Клинички, а за возврат државата да добие еден отсто од вкупните остварени годишни приходи.
Владата на седница во август минатата година донесе одлука да се градат монтажни катни гаражи на Клиничкиот центар со јавно-приватно партнерство и формираше Комисија за спроведување на постапката.
Сега со паркингот на Клинички стопанисува ЈП „Градски паркинг“ Скопје.