„Барањата за субвенционирани придонеси од страна на владата се камен за сопнување смислен од СДС, а реализиран од ССМ, кој е препознаен од народот како манипулација. Крајниот план на СДС е застој во развојот на државата, а ССМ под палка на Слободан Трендафилов кој одработува за неговата позиција е само алатка“, изјави денеска на прес-конференција пратеникот на ВМРО-ДПМНЕ
Владејачката ВМРО-ДПМНЕ и денеска го обвини претседателот на Сојузот на синдикатите на Македонија (ССМ), Слободан Трендафилов дека ја злоупотребува функцијата и го внесува Синдикатот во непринципиелни сојузи со партиите од опозицијата, СДСМ и Левица.
Овие ставови и обвинувања до Трендафилов, што на прес-конеференција ги изнесе пратеникот од редовите на ВМРО-ДПМНЕ во Собранието, Бране Петрушевски, доаѓаат по барањето на ССМ до Владата за зголемување на минималната плата за 6 000 денари и субвенционирање придонесите.
Ова барање на Сојузот на синдикатите на Македонија го поддржаа од СДСМ, од каде наведоа дека зголемувањето на минималната плата на 500 евра е последната шанса за спас на стандардот на граѓаните.
Од владејачката партија, пак, велат дека ССМ ги повторува тезите на СДСМ, а целта им е да го закочат развојот на државата.
„Барањата за субвенционирани придонеси од страна на владата се камен за сопнување смислен од СДС, а реализиран од ССМ, кој е препознаен од народот како манипулација. Крајниот план на СДС е застој во развојот на државата, а ССМ под палка на Слободан Трендафилов кој одработува за неговата позиција е само алатка. СДС има за цел преку ССМ да ја закочи државата десетици милиони евра наместо во развој да се трошат на придонеси. СДС сака да нема нови патишта, болници, училишта, градинки. СДС сака да го запре развојот, кој веќе е воочлив. СДС не може да се помири со фактот што државата тргна напред, а економскиот раст во последните два квартали од минатата година е над 3%. СДС се свесни дека со вакво темпо на развој на државата, тие уште толку ќе потонат во заборав, па преку вештачки наметнати теми сакаат да бидат актуелни. И за таа тема го користат ССМ и Трендафилов“,
изјави Петрушевски.
Дополнително, тој рече и дека за претседателското место во СДСМ, Трендафилов „дебело одработува за СДСМ“ и дека и тој и опозициската партија се коцкаат со иднината на државата.
Претседателот на Сојузот на синдикатите на Македонија, Слободан Трендафилов, во понеделникот на прес-конференција рече дека до Владата, до претставниците на работодавачите и до координаторите на пратеничките групи во Собранието ќе достават предлог во кој бараат дополнително зголемување на минималната плата за 6 000 денари, а работодавачите да бидат субвенционирани за плаќање на придонесите за социјално осигурување во период најдолго за 12 месеци.
Одговарајќи на новинарски прашања на темата, премиерот Христијан Мицкоски вчера изјави дека во буџетот нема пари за субвенционирање на разликата во придонесите меѓу 24 400 до 500 евра минимална плата и рече оти жали што Сојузот на синдикати на Макеоднија „полека, но сигурно се претвора во партиска бина на коалицијата Левица, СДСМ и ДУИ.
„Тие одбрале таков начин да функционираат. Жалам што во минатото изостана овој предлог. Тие мислат дека сега ќе го исцрпат буџетот и дека ние ќе дадеме 100 до 200 милиони денари за нив, а нема за улици, градинки, училишта, канализации“,
рече премиерот.