Денешниот дневен ред на парламентот содржи околу 70 точки, вклучително и констатирање на оставката на владата. Премиерот во оставка Милош Вучевиќ ја поднесе својата оставка на 28 јануари како одговор на масовните протести што бараа одговорност за трагедијата во Нови Сад, каде што на 1 ноември минатата година, при уривање на бетонската натстрешница на железничката станица, загинаа 15 лица
Опозицијата во српскиот парламент денеска ја бојкотира седницата по вчерашниот инцидент со димни бомби, во кој беа повредени три пратенички од владејачката Српска напредна партија. Српскиот претседател Александар Вучиќ синоќа во изјава за телевизија Пинк рече дека пратеничките се во стабилна состојба.
Полицијата рано утрово ја пребара пленарната сала на собранието по дојава за поставена експлозивна направа, но ништо сомнително не беше пронајдено.
Денешниот дневен ред на парламентот содржи околу 70 точки, вклучително и констатирање на оставката на Владата. Премиерот во оставка Милош Вучевиќ ја поднесе својата оставка на 28 јануари, како одговор на масовните протести што бараа одговорност за трагедијата во Нови Сад, каде што на 1 ноември минатата година, при уривање на бетонската натстрешница на железничката станица, загинаа 15 лица.
Опозициските партии сметаат дека владата во оставка нема легитимитет да носи нови закони. Студентите, кои од крајот на ноември протестираат во знак на поддршка за жртвите од Нови Сад, ја отфрлија законодавната иницијатива за зголемување на средствата за универзитетите за 20 отсто, нагласувајќи дека нивните примарни барања се правда за жртвите и прекин на судските постапки против демонстрантите.
Во парламентот на Србија вчера дојде до судир и фрлање димни бомби, поради што набрзо целата сала беше обвиена во чад.
Опозициските пратеници запалија црвени димни бомби, додека во салата можеше да се забележи и црн и бел чад. Тие, исто така, развиорија транспарент на кој пишуваше „Србија се крева за да падне режимот“ и држеа српско знаме.
Еврокомесарката за проширување Марта Кос изрази загриженост за инцидентите и потсети оти институциите на Европската Унија постојано повикуваат на деескалација на тензиите преку воспоставување услови за инклузивен дијалог во кој ќе бидат вклучени засегнати страни – политичките актери, институциите и граѓанското општество, со цел решавање на реформите неопходни за иднината на Србија во ЕУ.