Мајки Медисон доби „Оскар“ за најдобра актерка, а Адриен Броди за најдобар актер
Во Лос Анџелес утрово се одржа 97. доделување на „Оскарите“, а филмот „Анора“ освои пет златни статуетки, меѓу кои за најдобар филм, женска главна улога, монтажа, режија и оригинално сценарио. Номинација имаше и за споредна машка улога.
Режисерот Шон Бејкер доби „Оскар“ за најдобра режија за „Анора“, филм за егзотична танчарка и сексуална работничка која добива шанса за нов живот кога се мажи за син на руски олигарх.
Дваесет и петгодишната Мајки Медисон е прогласена за најдобра актерка во филмот „Анора“, освојувајќи го својот прв „Оскар“. Нејзината улога во „Анора“ ѝ ја донесе наградата за најдобра актерка на наградите „Независен дух“ и на британските награди БАФТА.
Адриен Броди го доби својот втор „Оскар“ за најдобар актер за улогата на имигрантски архитект во епската повоена драма „Бруталист“.
Зои Салдања доби „Оскар“ за најдобра споредна женска улога за нејзината улога како адвокатка од Мексико Сити во криминалната драма и мјузиклот „Емилија Перез“.
Кијеран Калкин доби „Оскар“ за најдобра споредна машка улога за улогата на американски турист со моторна уста во филмот „Вистинска болка“.
Базел Адра, Рејчел Сзор, Хамдан Балал и Јувал Абрахам добија „Оскар“ за најдобар документарен филм за „Нема друга земја“. Титулата за најдобар краток документарен филм му припадна на филмот „Единствената девојка во оркестарот“.
Филмот „Јас не сум робот“ освои „Оскар“ во категоријата најдобар краток филм.
Добитниците на „Оскар“ ги избираат околу 11 000 актери, продуценти, режисери и филмски работници кои ја сочинуваат Академијата за филмски уметности и науки.