Од Министерството за внатрешни работи (МВР) завчера соопштија дека се поднесени кривични пријави против 10 лица, меѓу кои и против поранешниот директор на истражниот затвор „Скопје“ во Шуто Оризари, Ф. А., и затворскиот полицаец С. К., кои се сомничат за злоупотреба на службената положба и овозможување бегство на лице лишено од слобода
Владејачката ВМРО-ДПМНЕ и денеска го прозва опозицискиот Социјалдемократски сојуз (СДСМ) со барање да го исклучи Филип Андонов од член на Централниот одбор на партијата.
Ваквиот повик на власта доаѓа откако дел од медиумите објавија дека меѓу осомничените во акцијата на МВР и Основното јавно обвинителство за гонење организиран криминал и корупција (ОЈО ГОКК) за злоупотреби во затворот „Скопје“ во Шуто Оризари е и поранешниот директор на оваа казнено-поправна установа, Филип Андонов.
Од владејачката партија ги повторија обвинувањата дека ексдиректорот од затворот во Шуто Оризари направил хотел, овозможувајќи им на осудени лица да излегуваат кога сакаат и каде сакаат со тоа што униформирани лица тајно ги транспортирале со службени возила до местата каде тие сакале.
„СДС и Филип Андов Сокол наместо да се борат против криминалот, преку нив државата работела за криминалците. СДС да не го штити, туку да го осуди и исклучи од ЦО Филип Андов Сокол. Правда и одговорност мора да има. Време е корумпираните носители на јавни функции да бидат онеспособени и спречени да го корумпираат општествениот систем. Приоритет на Владата предводена од ВМРО-ДПМНЕ е одлучна, неселективна и бескомпромисна борба против криминалот и корупцијата во општеството“, се вели во соопштението на ВМРО-ДПМНЕ.
Од Министерството за внатрешни работи (МВР) завчера соопштија дека се поднесени кривични пријави против 10 лица, меѓу кои и против поранешниот директор на истражниот затвор „Скопје“ во Шуто Оризари, Ф. А., и затворскиот полицаец С. К., кои се сомничат за злоупотреба на службената положба и овозможување бегство на лице лишено од слобода.
Како што наведоа од МВР во соопштението, пријавениот Ф. А. како директор на затворот во период од март 2024 до 24.07.2024 на противзаконит начин, злоупотребувајќи ја својата службена положба, наредил повеќе осудени лица од висок безбедносен ризик во повеќе наврати да добијат и да се стекнат со поволности кои не им следувале.
Вчера, Основниот кривичен суд Скопје, на предлог на ОЈО ГОКК им одреди мерки за претпазливост на сите 10 лица поврзани со акцијата спроведена во КПУ затвор „Скопје“.