„Претседателот Доналд Трамп и потпретседателот Џеј Ди Венс секогаш ќе се залагаат за интересите на американскиот народ и на оние кои ја почитуваат позицијата на САД во светот“, објавено е на веб-страницата на Белата куќа по средбата на американскиот и украинскиот претседател
Претседателот Доналд Трамп и потпретседателот Џеј Ди Венс секогаш ќе се залагаат за интересите на американскиот народ и на оние кои ја почитуваат позицијата на Соединетите Американски Држави во светот.
Ова е објавено на официјалната веб-страница на Белата куќа непосредно по средбата на Трамп и Венс со украинскиот претседател Володимир Зеленски во Вашингтон, која се разви во тензична расправа.
„Претседателот Доналд Трамп и потпретседателот Џеј Ди Венс секогаш ќе се залагаат за интересите на американскиот народ и на оние кои ја почитуваат позицијата на Соединетите Држави во светот. И никогаш нема да дозволат да се искористи американскиот народ“, стои во објавата на Белата куќа.
Денешната средба на Трамп и Зеленски во Белата куќа се сведе на обвинувања на сметка на украинскиот лидер оти не е благодарен за поддршката на САД и дека покажал непочитување кон Соединетите Држави.
По средбата, Зеленски ја напушти Белата куќа и во статус на социјалната мрежа Икс напиша:
„Ти благодарам Америка, благодарам за поддршката и за оваа посета. Му благодарам на претседателот Доналд Трамп, на Конгресот и на американскиот народ. На Украина ѝ треба праведен и траен мир, и ние работиме на тоа“, пишува Зеленски во објавата на Икс.