Пратеничката Петровска поставувајќи прашања се осврна на неодамнешните изјави на министерката за цените на храната, како грашокот од конзерва и количината на млеко што треба да ја консумира едно семејство, Димитриеска-Кочоска место да одговори ја нападна Петровска на лична основа за нејзината семејна состојба
Високите цени на производите во маркетите денеска беа причина за вербална расправија во Собранието на седницата за пратенички прашања.
Пратеничката од Социјалдемократскиот сојуз на Македонија (СДСМ) Славјанка Петровска поставувајќи прашања се осврна на неодамнешните изјави на министерката за финансии Гордана Димитриеска-Кочоска за цените на храната, како грашокот од конзерва и количината на млеко што треба да ја консумира едно семејство.
Димитриеска-Кочоска место да одговори ја нападна Петровска на лична основа за нејзината семејна состојба. Димитриеска-Кочоска налутено и порача на Петровска дека не може да и каже оти е почитувана бидејќи, како што рече, тоа треба прво да се заслужи.
Славјанка Петровска, која прва излезе на говорницата на седницата за пратенички прашања, рече дека изјавата на министерката од пред една недела е нелогична додавајќи дека на семејствата им е важно колку време ќе биде уклучен шпоретот за да се зготви грашок мислејќи на тоа дека оној производ од конзерва побрзо се вари.
„Пред една недела имавте за мене нелогична изјава кога рековте дека за вас не може да биде логично да купувате грашок од конзерва или дека една четиричлено семејство треба да конзумира 13 литри млеко месечно. За цената на таблата јајца не коментирам, можеби имате некој попуст за редовност. Но, не сакам оваа дебата со вас да ја сведам на тоа што значи грашокот од конзерва, споделување рецепти, ама следен пат кога ќе одите во маркет земете и споредете време на готвење на тој грашок од конзерва кој за вас е нелогичен и на оној другиот. Можеби на вас не ви е важно, ама на едно просечно македонско семејство му е важно колку време ќе биде вклучен шпоретот“, рече Петровска.
Таа се осврна и на количината на млеко во потрошувачката кошничка која е 13 литри за четиричлено семејство за еден месец.
„Подеднакво важно е за една мајка дали ќе може во текот на цел на месец на своите деца да им дава по една чаша млеко. Ако ја направиме логиката што вие ја наметнавте за четиричлено семејство тогаш ќе видите дека 13 литри млеко не се доволно освен ако не го заменувате со бадемово или некое друго“, додаде Петровска.
На нејзините прашања, министерката Димитриеска-Кочоска рече дека не очекувала од Петровска да вади зборови од контекст и да „спинува“, туку директно да го постави прашањето.
„Не можам да кажам почитувана зошто прво треба да го заслужите мојот почит. Не очекував од жена што јавно ја бранев во ситуации кога зборуваа дека пиела дијазепами, вадеа лекарски решенија и што уште не, очекував минимум почит. Тој минумум почит значи дека нема да спинувате, нема да вадите зборови од контекст туку директно ќе ми го поставите прашањето. Е бидејќи се однесувате така како што се однесувате од овој момент и таа минимум почит ја немам“, рече Димитриеска-Кочоска.
Нејзиниот понатамошен одговор продолжи со коментар за семејниот статус на Петровска прашувајќи ја „врз основа на што вие ги ставате во уста мајките што имаат деца и како вие знаете едно повеќечлено семејство колку треба да троши“.
„Јас сум мајка на два сина и многу добро знам колку треба да троши едно четиричлено семејство. И чисто вака да ви укажам да проверите на Државниот завод за статистика, согласно последниот попис што вие го направивте, во Македонија просечно е тричлено семејство, а не четири. Во однос на грашокот, и јас сакам да купам од конзерва, ама не сум сама, четири члена сме и мора да одиме во еден од најевтините маркети и да купиме замрзнат грашок, а не оние што се поскапи од 100 денари и се со иста грамажа како смрзантите. Исто беше искоментирано и во однос на литрите млеко. Некое семејство може троши и 18 литри млеко, меѓутоа има и такво што не пие. Бадемовото вас ќе ви го оставам, вам ви треба, а не мене!“, беше одговорот на министерката која нервозно замина од говорницата.
Петровска возврати дека нема да реагира на навредите и и порача на колешката „ако имаше дно, вие го пробивте“.
„Мислев, министерке, дека извлековте поуки од вашите претходни испади на Комисијата за финансирање и буџет, кога ве повлекоа од партијата со наредба да не доаѓате во Собрание. Нема да одговарам на вашите неумесни коментари. Ако имаше дно, вие го пробивте“, заклучи Петровска.