Досега, според министерката за образование и наука, има неколку интересни предлози, кои, како што посочи, генерално се однесуваат на зголемување на бројот на часови за секој предмет и дополнување на наставата со нови предмети. Но, тоа, како што вели, е неостварливо бидејќи доколку се реализира, учениците ќе треба да поминуваат на училиште најмалку 10 до 11 часа во текот на работниот ден
Јавната расправа за концепцијата за реформи во средното образование сè уште трае и во нејзини рамки се планирани дополнителни посети и средби, изјави денеска министерката за образование и наука Весна Јаневска, додавајќи дека е затворена само расправата што се одвиваше преку информатичкиот систем ЕНЕР.
Министерката и денеска, одговарајќи на новинарски прашања, рече дека имаат отприлика една година да ја стокмат концепцијата за да изгледа како што треба и да биде соодветна на програмите од Европската Унија.
Досега, рече таа, има неколку интересни предлози, кои, како што посочи, генерално се однесуваат на зголемување на бројот на часови за секој предмет и дополнување на наставата со нови предмети.
Според министерката, тоа не е можно да се оствари бидејќи доколку се реализира, децата ќе треба да поминуваат на училиште најмалку 10 до 11 часа.
„Кога го направивме распоредот според барањата на стручната јавност, здруженијата и наставниците, излезе дека учениците секоја година од прва до четврта треба да бидат на училиште најмалку 10 до 11 часа, за да нема забуна, тоа се 10 до 11 часови во работниот ден. Тоа не е можно. Сето тоа ќе треба да си изанализира, искомбинира, да, нашите деца да бидат подолго на училиште, тоа што Владата како проект го предлага, но тие не можат да бидат 11 часа во денот на часови. Треба да имаат и други активности, треба да имаат театарска претстава, треба да имаат хор, треба да имаат ликовно и музичко, затоа што и преку нив многу се учи многу“,
рече Јаневска.
Инаку, предложената концепција за реформи во гимназиското образование предизвика многубројни реакции од стручната фела, а особено од Филозофскиот факултет, имајќи предвид дека со реформите се предвидува бришење на логиката и етиката од корпусот предмети во средното гимназиско образование, додека предметот филозофијата од задолжителен се предлага да биде само изборен.
Критики за новата концепција за средно образование пред камерата на „360 степени“ дадоа и професорите од Катедрата по филозофија при Филозофскиот факултет, а некои од забелешките се директно упатени кон министерката Весна Јаневска.
Одговарајќи на новинарско прашање во врска со едносменската настава, министерката информира дека таа досега е воведена во 141 училиште, а ќе треба да се воведе уште во многу и тоа е процес што ќе потрае.
„Во овој момент Министерството прави една голема, опсежна анализа со цел да догради училници таму каде што е неопходно до шест училници и веќе имаме лоцирано повеќе такви училишта низ целата земја. Тој проект е завршен и сега продолжуваме да видиме колку ќе оди од шест нагоре училници, до 10-15, тоа веќе можат да бидат нови училишта. Знаете, во некои општини имаме проблем со маркиците, урбанистичките планови, веројатно ќе се доградуваат катови итн., но во моментот работиме на над стотина такви училишта, а ќе ја покриеме целата територија“,
изјави министерката.
Надоврзувајќи се, таа додаде дека дел од училиштата ќе се оптимизираат, односно оние кои функционираат со пет ученици нема да да можат понатаму да опстојат, бидејќи тоа е на штета на учениците.
„Затворени ученици во група од пет, изолирани од останатиот свет не можат да постигнуваат резултати како оние што се наоѓаат во поголеми групи, во подобро опремени училишта, така што тие процеси ќе одат заедно. Секогаш сум велела дека тоа не може да се направи во шест месеци, нека трае со години, но треба да се заврши“,
кажа Јаневска.