Министерката најави дека денеска ќе бидат потпишани седум согласности за вработување во Комисијата за заштита на конкуренцијата
Министерката за финансии Гордана Димитриеска-Кочоска признава дека поради немањето доволно капацитети институциите не можеле да излезат на терен и оти се работи на нивно доекипирање. Но, тоа не значи, како што рече, дека состојбата не може да се исконтролира и после една година.
„Точно е тоа дека во овој период одредени институции поради лимитираните капацитети не можеле да излезат и да ги исконтролираат состојбите, но кога станува збор за пари и финансиски трансакции, се останува вечно. Тоа значи дека на пример можеме и по 12 месеци да направиме контрола и доколку утврдиме неправилности, ќе следуваат казни. Затоа апелирам до сите компании во државата да се почитуваат законите бидејќи во некој момент некоја од институциите ќе излезе на терен и ќе направи контрола по што ќе следуваат драконски казни“,
рече Димитриска-Кочоска.
Таа најави и дека денеска ќе бидат потпишани седум согласности за вработување во Комисијата за заштита на конкуренцијата.
По денешниот бојкот на маркетите поради високите цени на основните прехранбени продукти, од Управата за јавни приходи најавија дека ќе излезат со информација дали и за колку е намален прометот во трговските синџири.
Повиците за бојкот на маркетите што изминатата недела се ширеа на социјалните мрежи дојдоа откако се појавија вести за слични граѓански акции во регионот – во Хрватска, Босна и Херцеговина и во други држави.
Најавата за бојкот наиде на оправдување кај целата јавност, а поддршка доби од политичките партии и од власта и од опозицијата.
Податоците на Сојузот на синдикати на Македонија покажуваат дека минималните трошоци на едно четиричлено семејство во јануари се зголемени за 391 денар во однос на декември. Во делот на храната и пијалаците се бележи зголемување од 123 денари. Воедно од ССМ, посочуваат дека вредноста на синдикалната минимална кошничка за само една година пораснала за 6.089 денари, што значи зголемување од 10,63 проценти.
Најновите статистички податоци покажуваат дека трошоците за живот во 2024 година во однос на 2023 година бележат пораст од 3,5 проценти, а цените на мало од 3,8 проценти.
Денеска, кога требаше да има бојкот, она што можеше да се забележи е дека во дел од маркетите имаше по еден или двајца купувачи, во некои немаше никој, а во трет маркет, кој се наоѓа во близина на основно училиште, имаше раздвиженост, но речиси сите беа ученици што купуваа појадок.