Државниот санитарен и здравствен инспекторат (ДСЗИ) има направено 116 вонредни инспекциски надзори во градскиот, и додека беше во функција, и во меѓуградскиот автобуски сообраќај, информираше директорката на Инспекторатот Ирина Сотирова-Бухова на денешната прес-конференција.
Таа, одговарајќи на новинарско прашање колку се почитуваат мерките во јавниот градски сообраќај, како носење маска и држење дистанца, рече дека нивна надлежност е проверката на дезинфекција на превозните средства.
„Надлежноста на Државниот санитарен и здравствен инспекторат се состои во тоа колку пати се врши дезинфекција и дали има задолжителни дезинфекциски средства во јавниот и приватниот градски сообраќај, односно автобусите такси-возилата и нивните служби. Исто така, наша надлежност е да провериме дали возачите и останатиот персонал носат заштитна опрема маски и ракавици“,
рече Сотирова Бухова.
Во однос на тоа колку патници има, дали се почитува алгоритмот кој е веќе поставен и дали патниците носат заштитни маски, ДСЗИ немал ингеренции да постапува.