Според неа, една од основните забелешки на нашиот систем на помилувања или на намалувања на казните е многу краткиот период, затоа што, како што посочи, правото на помилување или на милост е човечко право. Она што е најважно, вели таа, при помилувањето е судот
Потребен е нов закон за помилување во чиј фокус би биле луѓето затвореници, оти сегашниот не е системски поставен, смета претседателката Гордана Сиљановска-Давкова.
Таа нагласи дека била запозната со кривичните дела на неколкуте осудени лица кои се помилувани по повод новогодишните празници.
„Се разбира дека знам. Работата е во рацете на Комисијата за помилување. Претходно стигна предлог од Министерството за правда, се видов дури и со министерот за правда. Ми ги опишаа сите случаи и да објаснам за јавноста – кога човек ќе чуе помилување мисли дека некој е целосно ослободен. Овие помилувања главно се однесуваат на три месеци“,
рече Сиљановска-Давкова одговарајќи на новинарско прашање по посетата на припадниците на Армијата во касарната „Јане Сандански“ во Штип.
Според неа, една од основните забелешки на нашиот систем на помилувања или на намалувања на казните е многу краткиот период, затоа што, како што посочи, правото на помилување или на милост е човечко право. Она што е најважно, вели таа, при помилувањето е судот.
„Ниту Министерството за правда, ниту Комисијата за помилување можат или смеат да играат улога на истражни органи – да се јавуваат во АНБ или АР за да ги проверуваат луѓето. Тоа е работа на судот – значи судијата го креира профилот, досието што доаѓа кај нас. Само судот може да ги проверува фактите и доказите, не ние. За мене најважно е кој и како ја прави селекцијата во затворите – кога ќе побараат или самите затвореници или нивните најблиски намалување на казната и кој го ниже досието. Ако внатре ги немате сите потребни елементи, тогаш ниту Министерството за правда, ниту ние може навистина да имаме вистинска претстава за луѓето. Затоа, велам дека во иднина дури и во рамки на Судскиот совет би можело да се разгледува начинот на кој што судиите ги креираат досиејата за луѓето, бидејќи од тоа зависи како ќе постапуваме ние“,
потенцира претседателката на државата.
Според претседателката, потребен е нов модерен закон за помилување во кој што суштината ќе бидат луѓето затвореници.
Во однос на тоа дали би требало да се предвиди поголем период од три месеци за помилување, таа додава дека тоа треба да го предложат овластените предлагачи на закони, но вели, можеби е потребно да се преиспита и самата казнена политика.
„Ние не сме имале случај на помилување на луѓе кои биле доживотно осудени или на многу долги казни. Прашањето во Советот на Европа е зошто некому на 70 години да не овозможите да ја види светлината на денот и да си ги види своите. Сите тие прашања и многу други ќе дојдат на дневен ред и тоа ќе биде еден хуман пристап на една одговорна држава која води сметка за сите граѓани“,
вели Сиљановска-Давкова.
Од Кабинетот на претседателката вчера информираа дека по повод новогодишните празници помилувани се седум лица од кои едно потполно, а шест делумно. Шестемина осудени лица се помилувани во траење од три месеци, а едно лице три месеци и четири дена, што кај него доведува до потполно ослободување од извршување на казната затвор.