Владата донела одлука и дека започнува исплатата на К-15 за сите вработени во целата администрација, за што се обезбедени околу една милијарда денари
Замрзнување на платите на именуваните и избраните лица, судиите, членовите на Судскиот совет, јавните обвинители и членовите на Советот на јавните обвинители. Ова е одлуката што денеска е донесена на седница на Владата со која се потврдува дека платите на избраните и именуваните лица нема да растат.
За владината одлука денеска со објава на својот фејсбук-профил информира премиерот Христијан Мицкоски.
„Целосно свесен за времето во кое живееме и фактот дека се бориме со последиците од минатото, на денешната седница Владата донесе одлуки со кои нема да растат платите на именуваните и избраните лица, судиите, членовите на Судскиот совет, јавните обвинители и членовите на Советот на јавните обвинители и тие преку интервенција во коефициентите за пресметка на платите се замрзнуваат“,
пишува Мицкоски во објавата.
Исто така, премиерот вели дека нема да има исплата на 13. плата во сите органи на државната управа и средствата ќе се пренасочат за развојни проекти.
Мицкоски, покрај ова, информира и дека започнува исплатата на К-15 за сите вработени во целата администрација.
За одлуката денеска владината портпаролка Марија Митева вели дека се задолжени министерствата за економија и труд и за правда, секое во своја надлежност, да достават изменување и дополнување на законите, на тој начин што ќе се изврши намалување на утврдените коефициенти за пресметка на платите, со цел да не се направи дополнителна штета.
„Актуелните законски решенија предвидуваат пораст на платите на избрани и именувани лица, но Владата со цел да го заштити јавниот интерес и да нема дополнителни фискални импликации врз Буџетот донесе одлука со која ќе се направи измена и дополнување на законите каде нема да се загрози и влоши состојбата на избраните и именувани лица. Односно ветивме дека едно е сигурно и тоа го исполнуваме зголемување на платите на избраните и именуваните лица нема да има. Со ова замрзнување го намалуваме тој процент од година во година, се со цел да дојдеме до процент еднаков на нула“,
вели Митева.
Митева рече и дека се обезбедени околу една милијарда денари во билансот на буџетот за исплата на К-15, што е законска обврска за сите работодавачи.
Платите на функционерите од април минатата година пораснаа за 78 отсто откако Уставниот суд оцени дека постои неусогласеност со Уставот, односно дека се повредува владеењето на правото.
Одлуката од Уставен ја образложија со тоа дека во истиот закон постоело двојство, контрадикторни одредби коишто доведувале до нејасна и збунувачка примена.
„Членот 4 и членот 1, коишто сега се веќе укинати, предвидуваа фиксна основица од 26 755 денари, додека од друга страна, членот 11 предвидува дека пресметката на плата се прави според множење на коефициентот со просечната плата којашто била исплатена во текот на минатата година“,
рекоа тогаш од Уставен суд.
Во однос на тоа зошто не е укинат членот 11, туку членовите 4 и 1, Беловска рече дека тој член не бил оспорен, туку единствено оспорени биле двата члена кои се укинати, како и дека членот 11 е основен и ниту еднаш досега не бил менуван, за разлика од членот 4 и членот 1, кај кои во минатото е интервенирано 15 пати.
Со ваквата одлука како основа за пресметка останува само годишната просечна плата која секоја година расте, а со неа треба да се зголемуваат и функционерските плати.
Во февруари годинава во Собранието беа изгласани измени на шесте закони со кои се намалуваат коефициентите на платите на избраните и именуваните лица.