Филипче денеска пред почетокот на 30. Конгрес порача дека е праведно сите да прифатат дека се виновни за поразот на минатите избори, но, како што нагласи, тој не е крај, туку шанса за нов почеток. Според него, неговите двајца претходници, Зоран Заев и Димитар Ковачевски, ги занемариле ветувањата дадени пред граѓаните и ги жртвувале своите политички кариери за сметка на големите национални прашања, а тоа не било наградено со очекуваната поддршка. Тој ја критикуваше власта и нагласи дека таа ја турка државата во ново режимско владеење и ја кочи евроинтеграцијата
Најголемата опозициска партија СДСМ денеска во хотелот „Александар палас“ во Скопје го одржува 30. Конгрес на кој ќе се донесе одлука за избор на новиот состав на Централниот и Надзорниот одбор на партијата и избор на заменик претседател на СДСМ.
Лидерот на партијата Венко Филипче во своето обраќање пред делегатите истакна дека овој конгрес ќе биде пресвртница за СДСМ. Нов почеток, нова борба, нова надеж дека партијата ќе се врати на победнички патеки, најави Филипче и нагласи дека додека е тој претседател ароганцијата ќе биде закопана длабоко земја.
Тој посочи дека нема волшебно решение со кое СДСМ преку ноќ ќе стане владејачка партија, но порача пред делегатите дека ги чека макотрпна работа.
„Поминаа пет месеци откако бев избран за претседател на СДСМ. Имав можност да се уверам дека да се води оваа државотворна партија е потешко и од најсложените неврохируршки операции. Се сретнав со стотици луѓе. Членови, поранешни функционери, општествено активни луѓе, меѓу кои и лица кои никогаш претходно не стапнале во политичка партија. Внимателно слушав секој од нив, педантно ги забележав сите нивни аргументи, забелешки, критики. Со многу критики се согласувам и советите на сите добронамерни луѓе ќе бидат водилка за новото раководство. Но, никогаш нема да прифатам и да подлегнам на оние кои потајно сакаат СДСМ да не го биде, кои шират дефетизам и го парализираат опозициското дејствување. СДСМ нема да се откаже, тоа треба на сите да им биде јасно. Напротив, СДСМ ќе го биде и СДСМ ќе се врати посилен“,
дециден беше Филипче додавајќи дека ќе отвори врата за сите кои и мислат добро на партијата.
Филипче порача дека е праведно сите да прифатат дека се виновни за поразот на минатите избори, но, како што нагласи, тој не е крај, туку шанса за нов почеток. Според него, неговите двајца претходници, Зоран Заев и Димитар Ковачевски, ги занемариле ветувањата дадени пред граѓаните и ги жртвувале своите политички кариери за сметка на големите национални прашања, а тоа не било наградено со очекуваната поддршка.
„Причините за оваа лоша состојба се повеќеслојни. Заради големите национални прашања како полноправното членство во НАТО Алијансата, напорите за почеток на преговори за полноправно членство во ЕУ, решавање на отворените прашања со соседите, нашите влади ја занемарија ефикасноста во обезбедување на сервисните функции на државниот апарат. Сметам дека не смееше да дозволиме речиси целата енергија да ја насочиме на евроинтеграциите, но и тие да бидат оправдување за неиспорачување на дел програмата и ветувањата кои ги дадовме пред граѓаните. Истовремено, дозволивме едно од најчувствителните историски прашања за македонскиот народ, спорот со Бугарија, да ги преклопи и сите добри работи и реформи што ги направивме. Но, не сметам дека стратешки погрешивме. Се вложивме 100 проценти, не калкулиравме, не бевме популисти, направивме тешки жртви. Двајцата мои претходници, Заев и Ковачевски ја жртвуваа својата политичка кариера за денес да сме членка на НАТО и да имаме започнато преговори со Европска Унија. За жал, таквата длабока посветеност, не беше наградена со очекуваната мера“,
констатира актуелниот лидер на СДСМ.
Филипче се осврна и на својот владин коалициски партнер ДУИ, за кој рече дека ја злоупотребил нивната широчина, демократски капацитет за владеење и посветеноста за искрена инклузивност во работењето на сите нивоа во Владата.
„Од ова искуство треба да извлечеме една силна важна поука. Никогаш повеќе СДСМ не смее да биде во подредена положба или на штета на сопствениот рејтинг да ги одржува политичките коалиции. Исто така, не се справивме до крај со криминалот и корупцијата на нашите претходници. За жал, и некои функционери и во нашите Влади со задоволство прифатија многу лоши навики кои режимот ни ги остави во наследство. Затоа, токму во овој контекст ја користам шанса да испратам јасна порака. Сите случаи на корупција и прекршување на законите да бидат третирани од страна на надлежните државни институции, во објективна, непристрасна и независна постапка. Но барам, беспоговорно да се почитува начелото на пресумција на невиност, а секој криминал кој ќе биде докажан во фер и праведна постапка, да биде санкциониран“,
рече Филипче.2
Во својот говор тој се осврна и на изборот на нивната сопартијка Радмила Шекеринска за заменик-генерална секретарка на НАТО и нагласи дека тоа е уште една потврда оти СДСМ е секогаш на вистинската страна на историјата.
„СДСМ е особено горд што Радмила Шекеринска ја доби честа да биде првата дама од Балканот која ќе ја извршува должноста втор човек на НАТО. Радмила е симбол на интелигенцијата, политичката мудрост и визионерството кое го краси СДСМ од неговото основање. Нејзиното именување за заменик-генерален секретар на НАТО е уште една потврда дека СДСМ е секогаш на вистинската страна на историјата, носејќи го товарот на најважните историски одлуки за иднината на Македонија. Ова е и потврда за македонскиот национален идентитет кој само ќе јакне и ќе се етаблира во светски рамки“,
изјави Филипче пред делегатите на Конгресот.
Тој предложи нов состав на Централниот одбор на СДСМ кој, како што рече, ќе внесе нова енергија во партијата.
Филипче ја критикуваше власта нагласувајќи дека таа ја турка државата во ново режимско владеење и ја кочи евроинтеграцијата.
„Новото раководство на СДСМ ќе биде исправено пред голема одговорност – да ги разобличи лагите, популизмот и опасните политики на актуелната власт. Владата на Христијан Мицкоски и ВМРО-ДПМНЕ не само што ги изневери очекувањата на граѓаните, туку и ја турка Македонија во нова ера на режимско владеење. Добиваме режим во ново руво. ВМРО-ДПМНЕ историски секогаш бил кочничар на напредокот, а оваа гарнитура не е различна. Додека се прогласуваат за големи „Европејци“, нивните дела говорат спротивно. Македонија е заглавена на патот кон ЕУ поради недостигот од акција на оваа влада. Наместо да ги продолжат преговорите, блокираат клучни реформи и ја користат европската перспектива за дневно-политички поени. Но, граѓаните не се наивни. Точно ги читаат неискрените политичари кои ја освоија нивната доверба со веќе видените политички измами“,
рече Филипче.
На конгресот присуствуваат 536 делегати од 626, односно 85 отсто. Тука се и претставници на други опозициски партии НСДП, ЛДП и други.
Денеска продолжи и 29. Конгрес на партијата, кој се одржа пред почеток на 30. Конгрес на СДСМ, се констатира недоверба на органите на Централниот и Надзорниот одбор и се констатираше оставката на досегашната заменик-претседателка на СДСМ, Сања Лукаревска.