„Договорена е каматна стапка од 1,95 проценти, до три години грејс период и до 15 години рок на отплата во зависност од потребите на компаниите. Ценам дека е ова историски договор со историски најниска каматна стапка“, рече Мицкоски
Со банките е договорена каматна стапка од 1,95 проценти за унгарскиот кредит за компаниите, откри денеска премиерот Христијан Мицкоски. Од неколку од банките веќе имаме потврда, додаде Мицкоски, и рече дека очекува најголем дел од нив да застанат зад проектот за „конечно 250-те милиони евра од унгарскиот заем да бидат поделени на македонското стопанство“.
„Договорена е каматна стапка од 1,95 проценти, до три години грејс период и до 15 години рок на отплата во зависност од потребите на компаниите. Ценам дека е ова историски договор со историски најниска каматна стапка“,
рече Мицкоски одговарајќи на новинарско прашање по денешното пуштање во употреба на новата спортска сала во ООУ „Наум Охридски“ во скопското село Булачани.
За да добијат кредит, дополни премиерот, компаниите ќе треба да имаат минимум 20 отсто сопствено учество, а максималниот износ кој можат да го добијат е ограничен на 10 милиони евра.
„Тоа значи дека ќе имаме инвестициски бран од 300 милиони евра. Сите компании ќе имаат можност да ги вложат овие средства во основни средства за работа, во обновливи извори на енергија, како и во објекти кои ќе ги користат како свои административни згради, односно за сопствена потреба“,
рече Мицкоски.