„Денот на албанската азбука е потсетник за тоа како писменоста и образованието можат да бидат мостови меѓу луѓето. Не темите што не разделуваат, не политичките барања на поединци кои многу години претходно се криеја зад народот кого го крадеа. Јасното фокусирање кон приоритетите, кон реалните потреби за образование, економија и напредок ни помагаат да ги надминеме разликите, да ги споделиме нашите вредности и да изградиме посилна, поединствена заедница“, рече премиерот во своето обраќање на Свечената академија во Владата по повод 22 Ноември – Денот на албанската азбука
Писменоста и образованието не се луксузи – тие се основни права и најмоќни инструменти за трансформација на нашето општество. Нивната важност не може да се измери со бројки, но нивното влијание се гледа во подобриот живот на секој поединец и во напредокот на целата заедница, порача денеска премиерот Христијан Мицкоски во своето обраќање на Свечената академија во Владата по повод 22 Ноември – Денот на албанската азбука.
Оценувајќи го како симбол на образованието, културното богатство и напредокот на албанскиот народ, премиерот на почетокот на обраќањето, истакна дека овој ден нè потсетува на Конгресот во Битола, одржан во 1908 година, каде што, како што рече, со мудрост и единство, интелектуалците донеле одлука која ќе го трасира патот на албанскиот јазик кон иднината и создавање на единствена и стандардизирана азбука.
„Оваа одлука не беше само лингвистичка, туку беше акт на создавање иднина и едно културно обележје“,
рече Мицкоски.
Истакнувајќи дека живееме во време на силна диверзификација на различности, премиерот рече дека албанската заедница е дел од оваа мозаична слика и оти наша заедничка обврска е да продолжиме да градиме општество во кое секој граѓанин, независно од етничката или јазична припадност, ќе се чувствува рамноправен и ќе има можност да го даде својот придонес за заедничкото добро.
Во овој дух, рече премиерот, Денот на албанската азбука е потсетник за тоа како писменоста и образованието можат да бидат мостови меѓу луѓето.
„Не темите кои не разделуваат, не политичките барања на поединци кои многу години претходно се криеја зад народот кого го крадеа. Јасното фокусирање кон приоритетите, кон реалните потреби за образование, економија и напредок ни помагаат да ги надминеме разликите, да ги споделиме нашите вредности и да изградиме посилна, поединствена заедница“,
рече Мицкоски.
Говорејќи за писменоста и образованието, како вредности што го обликуваат секое општество, премиерот порача дека тие се основата на нашиот индивидуален и колективен развој и алатки што ни овозможуваат да ги оствариме целите и да изградиме подобра иднина.
„Писменоста е првиот чекор кон слободата. Таа ни овозможува да комуницираме, да разбираме и да го изразуваме својот потенцијал. Таа е алатка за стекнување знаење, за развивање критичко размислување и за навигација низ светот. Но, писменоста не е само учење на буквите и бројките – таа е мост што нè поврзува со нашата култура, историја и со светот што нè опкружува“,
рече премиерот.
Образованието, пак, како што додаде, ја надградува писменост и ни овозможува да го откриеме целиот спектар на можности кои ни стојат на располагање.
„Преку образованието, ги учиме основните вредности на човештвото – толеранцијата, почитта и емпатијата. Ги развиваме нашите способности, ги отвораме вратите кон нови идеи и стекнуваме алатки за решавање на предизвиците. Во нашата држава, образованието и писменоста се не само индивидуални потреби, туку и колективна одговорност. Тие се клучни за економскиот развој, за градење праведно и инклузивно општество и за зацврстување на демократијата. Само писмени и образовани граѓани можат активно да учествуваат во општествениот живот, да носат информирани одлуки и да придонесуваат за просперитетот на нацијата“,
кажа премиерот.
Дополнувајќи се во таа насока, тој порача оти мора да разбереме дека образованието не завршува во училишните клупи, туку е процес што трае целиот живот.
Како општество, тој порача дека мора да создадеме услови за постојано образование, за надградување на вештините и за охрабрување на креативноста.
„Но, за да го постигнеме тоа, потребна е заедничка заложба. Владата има одговорност да обезбеди квалитетно образование за сите – без разлика на етничка припадност, пол, географска положба или социјален статус. Семејствата имаат одговорност да ги поддржуваат своите деца во образовниот процес, а заедницата – да создаде средина во која знаењето ќе биде вреднувано и поттикнувано…Нека овој ден не инспирира да работиме заедно, со љубов кон знаењето, со почит кон историјата и со поглед кон иднината“,
порача Мицкоски на крајот честитајќи го Денот на албанската азбука.