Како причини поради кои не сообраќаат според зададениот возен ред, приватните превозници ги наведуваат неподмирените долгови кон нив од јуни годинава, недостаток на верификувани извештаи за јули, август, септември и октомври, како и ниската цена која им се плаќа за изминат километар, со која не можат да ги покријат основните трошоци
Приватните автобуски превозници во Скопје „Јофи бус“, „Вестор транс“ и „Радос компани“ денеска апелираа до надлежните за свикување проширен состанок со цел решавање на проблемот со јавниот превоз во главниот град.
Оттаму посочуваат оти располагаат со 200 автобуси кои не се максимално искористени, а со кои може да се пополни недостатокот на автобуси на Јавното сообраќајно претпријатие (ЈСП) „Скопје“. На дневно ниво, како што велат оттаму, во Скопје недостасуваат од 160 до 200 автобуси.
Како причини поради кои не сообраќаат според зададениот возен ред, приватните превозници ги наведуваат неподмирените долгови кон нив од јуни годинава, недостаток на верификувани извештаи за јули, август, септември и октомври, како и ниската цена која им се плаќа за изминат километар, со која, како што велат, не можат да ги покријат основните трошоци.
Негираат дека покачувањето на цената за изминат километар ќе значи и покачување на цената на билетот.
„Информацијата која беше пласирана во јавноста дека доколку се покачи цената за изминат километар кај приватните превозници ќе значи и покачување на цената на билетот, одговорно тврдиме дека не е така туку потребна е реформа во јавниот градски превоз. Ние сме последната дејност каде што нема покачување, немаме волшебно стапче да ги надоместиме загубите. Со покачувањето на цената ќе можеме да работиме рентабилно, но и нашите корисници ќе добијат понови еколошки климатизирани автобуси“,
се вели во соопштението од превозниците „Јофи бус“, „Вестор транс“ и „Радос компани“
Според приватните превозници, за да во целост да биде исполнет зимскиот возен ред по одлука на Совет за линиски превоз на патници во Град Скопје потребни се 352 автобуси или со резервни вкупно 444 автобуси.