„Постојано говорев дека треба да најдеме начин како да ги спроведеме заклучоците што ги усвоил Европскиот совет во врска со проширувањето на Македонија и Албанија. Оттука пак се враќаме на она, да, треба да ги спроведеме уставните измени, меѓутоа во уставниот закон, кој е последната или третата фаза имаме можност да го вградиме тоа одложено дејство“, рече Зајкова и додаде дека во секој закон може да се стави на крајот преодна одредба кога тој би стапил во сила
Претседателката на ЛДП, Моника Зајкова, смета дека може да се реализира планот на владејачката ВМРО-ДПМНЕ за одложени уставни измени бидејќи, според неа, не постојат датуми во Преговарачката рамка кои нè обврзуваат тие да стапат во сила веднаш. Зајкова вели дека постапката за уставни измени може да почне и сега, но таа би се завршила и измените би стапиле во сила со потпишувањето на пристапниот договор со Европската Унија.
„Позициите на ЛДП се дека во последните заклучоци ништо не нѐ спречува ние да ги спроведеме уставните измени, односно да ја почнеме постапката за донесување на уставните измени, за да стигнеме до таа последна фаза за уставниот закон, каде што самите предвидуваме кога истите би стапиле на сила. Точка 4 се однесува на тоа дека Македонија треба да ги спроведе уставните измени, точка 6 е дека ќе се одржи втората меѓувладина конференција без политичка одлука откако ќе го завршиме процесот на уставни измени согласно домашната процедура. Тоа остава можност за пошироко толкување, кое што нѐ води до она одложено дејство за кое што зборуваме и дека тука, ако тоа ни се позициите, треба да изградиме сите заедно една државна позиција дека да, еве ние сме ја завршиле нашата обврска, меѓутоа истите ќе стапат на сила откако сите земји членки, вклучително и Бугарија, ќе гласаат за“,
појасни Зајкова во емисијата Само вистина на Канал 5.
Според неа, во Преговарачката рамка никаде не пишува „to enter in force immediately”, што значи дека нема обврски тие веднаш да стапат во сила. Во самата Преговарачка рамка нема датуми по однос на стапување во сила, туку таа се однесува на примена на договорите кои што ги ратификувала земјата, во случајов Договорот за добрососедство во Бугарија. Она што е важно за државата е тоа дека обврските кои што сме ги презеле се во заклучоците.
„Постојано говорев дека треба да најдеме начин како да ги спроведеме заклучоците што ги усвоил Европскиот совет во врска со проширувањето на Македонија и Албанија. Оттука пак се враќаме на она, да, треба да ги спроведеме уставните измени, меѓутоа во уставниот закон, кој што е последната или третата фаза имаме можност да го вградиме тоа одложено дејство“,
рече Зајкова и додаде дека во секој закон може да се стави на крајот преодна одредба кога истиот би стапил во сила.
ЛДП предлага измените да стапат во сила откако сите земји членки, вклучително и Република Бугарија како земја членка, би го ратификувале пристапниот договор за членство на Македонија во Европската Унија, предлог што го туркаат ВМРО-ДПМНЕ и премиерот Христијан Мицкоски.
Вчера дел од медиумите, повикувајќи се на партиски извори, објавија дека ЛДП ќе излезе од коалицијата со СДСМ. Зајкова ја демантираше ваквата информација. Таа во изјава за Рацин.мк рече дека како пратеник останува да дејствува независно во Собранието и дека ЛДП е независен политички субјект, со своја политичка програма и со своја либерална идеологија.
„Ние како партија уште во мај донесовме одлука дека ќе дејствуваме независно, додека пак за локалните избори кои следуваат следната година ќе се одлучува на ниво на партиските тела како ќе настапиме, не е исклучено да настапиме и како независна партија“,
изјави Зајкова.
Шпекулации дека ЛДП ќе премине кон мнозинството во парламентот имаше и во мај, и тогаш партијата ги демантираше.