Општина Струмица и официјално се откажува од членството во ЗЕЛС – Костадинов ќе поднесе оставка од функцијата во Управниот одбор

Посочи дека од појавувањето на проблемот со водата на 27 септември годинава, ЗЕЛС не покажа апсолутно никаков интерес, иако е сведок на случувањата, а браната „Турија“ од која струмичани и шест населени места се снабдуваат со вода за пиење е под надлежност на Министерството за земјоделство, шумарство и водостопанство

Општина Струмица од денеска се откажува од членството во Заедницата на единиците на локалната самоуправа (ЗЕЛС). Одлуката е донесена во знак на револт поради индиферентниот однос во периодот кога струмичани се соочуваат со забрана за водата за пиење, како и по одбивањето од Владата за реализација на единствениот пријавен проект од оваа општина со средства од унгарскиот кредит. Ова денеска на својот фејсбук-профил го објави струмичкиот градоначалник Костадин Костадинов, посочувајќи дека истовремено ќе поднесе оставка и од функцијата член на Управниот одбор во ЗЕЛС.

„Општина Струмица како институција не е удостоена со ниту една писмена одлука од Владата и нејзините институции. За нив дознаваме преку медиумите. Поради тоа, го напуштаме ЗЕЛС. Членството ќе важи исклучиво за законските ингеренции за ЗЕЛС во однос на системите на општините, а за сè друго сме надвор од ЗЕЛС“,

вели Костадинов.

Посочи дека од појавувањето на проблемот со водата на 27 септември годинава, ЗЕЛС не покажа апсолутно никаков интерес, иако е сведок на случувањата, а браната „Турија“, од која струмичани и шест населени места се снабдуваат со вода за пиење, е под надлежност е Министерството за земјоделство, шумарство и водостопанство.

„ЗЕЛС не мрдна со малиот прст, напротив преку Агенцијата за храна и ветеринарство со анализите и резултатите од нив со игра мајтап со струмичани“,

напиша градоначалникот.

Според него, ова е еден од најголемите скандали во Европа за повреда на човековите права и уставните права и слободи, а тој како градоначалник, менаџерскиот тим и вработените во ЈПКД „Комуналец“ ќе продолжат во докажувањето на вистината дека водата е исправна и микробиолошки и по хемиско-физичкиот состав.

АХВ ја продолжи забраната за пиење на водата во Струмичко, градоначалникот обвинува дека резултатите не се точни

„Срамно и жално е да се тера политика врз здравјето на граѓаните на општина Струмица. Срамно е да се јадат печени костени во Ново Село, а да не се покаже никаков интерес за најголемиот предизвик со кој се соочуваат Струмица и струмичани“,

вели Костадинов.

Порача дека струмичани се издржливи на неправдите од власта предводена од ВМРО-ДПМНЕ и дека ќе излезат победници во едномесечната голгота за остварување на правото на чиста вода за пиење.

Костадинов и Јакимовски најавија дека општините Струмица и Карпош ќе ја напуштат ЗЕЛС

Покрај Костадинов, вчера и градоначалникот на скопската општина Карпош, Стевче Јакимовски, најави дека ќе ѝ се придружи на Општина Струмица во одлуката да го напуштат ЗЕЛС.