Во заштитената соба нема камери, нема да смее да се влезе со електронски уреди, нема ни тоалет, а пратениците со безбедносни сертификати од комисиите за надзор на безбедносните служби не смеат ништо да внесат ниту да изнесат од собата
Во Собранието денеска беше пуштена во употреба заштитена или „глува соба“, прва од ваков вид во Северна Македонија, дизајнирана со највисоко ниво на заштита за строго доверливи документи. Просторијата првенствено ќе ја користат Собранието и комисиите кои работат со класифицирани информации, но во исто време таа ќе може да се отстапи за користење на други државни органи доколку имаат потреба за тоа, со одобрување на Собранието.
Просторијата, како што истакна претседателот на Собранието Африм Гаши, ги исполнува сите стандарди за аудио и антирадијација и е опремена да гарантира безбедност на класифицирани информации придржувајќи се до највисоките ТЕМПЕСТ-стандарди за заштита од радијација.
Тој потсети дека уште во 2017 година пратениците и од власта и од опозицијата се договориле дека ваква соба во Собранието е повеќе од потребна да се изгради, како дел од пакетот мерки за подобар надзор над тајните служби.
Во заштитената соба нема камери, нема да смее да се влезе со електронски уреди, нема ни тоалет, а пратениците со безбедносни сертификати од комисиите за надзор на безбедносните служби не смеат ништо да внесат ниту да изнесат од собата. Состаноците ќе се снимаат само звучно, но потоа ќе бидат криптирани, а пратениците ако сакаат да ги преслушаат снимките тоа ќе можат да го сторат само во читалната во заштитената соба.
Заштитената просторија и заштитениот работен простор се дизајнирани да ги задоволат строгите безбедносни барања поставени од НАТО и од Европската Унија, што вклучува интегрирање технолошки заштитни мерки, а физичкиот простор е изграден од материјали кои спречуваат неовластено следење и прислушување, обезбедувајќи комуникациите да останат доверливи и заштитени од надворешни закани. Проектот ги вклучува најдобрите практики на управување со безбедносниот сектор и обезбедува приспособливост на идниот напредок во надзорот над безбедноста и разузнавањето.
Согласно Законот за класифицирани информации донесен 2019 година како дел од пакетот реформски закони, Собранието со изградбата на ваква соба ги презеде највисоките мерки и активности за административна, физичка и индустриска безбедност, безбедност на комуникациско-информациските системи, како и безбедност на лицата – корисници на класифицирани информации.
Оливер Спасовски, координатор на пратеничката група на СДСМ и поранешен министер за внатрешни работи, истакна дека со овој проект сериозно се зајакна капацитетот на Собранието, не само од безбедносен аспект туку се создаде аспект кој значително ќе ја подобри парламентарната контрола на безбедносните служби и на процесот на следење на комуникациите.
За реализација на т.н „глува соба“ во Собранието имаше шест јавни повици. Повеќето не беа успешни поради, како што објаснуваше поранешниот прв човек на Собранието Талат Џафери, несоодветни понуди.
Последниот јавен повик беше успешен и заштитената соба почна со изградба во јули 2023 година.