Од друга страна, опозициската партија, повикувајќи се синоќешното интервју на новиот директор на на АНБ, Бојан Христовски за емисијата „Код“ на ТВ Телма, реагира дека тој нема безбедносен сертификат за државна тајна и оти поднел барање за негово добивање дури откако, по партиска директива, беше назначен за директор на АНБ
Владејачката ВМРО-ДПМНЕ продолжува да ја брани одлуката на Владата за именување на Бојан Христовски за нов шеф на Агенцијата за национална безбедност, наспроти обвинувањата од опозицискиот СДСМ дека станува збор за кадар на владејачката партија со кој се партизира оваа институција.
Од СДСМ деновиве преку соопштија и прес-конференции во повеќе наврати реагираа на назначувањето на Христовски и ја повикаа Владата итно да го преиспита изборот и да го повлече од функцијата директор на АНБ.
На ваквите реакции од ВМРО-ДПМНЕ одговараат со контраобвинувања во кои велат дека СДСМ додека бил на власт ги партизирал и злоупотребувал безбедносните служби за приватни и партиски цели.
Во таа насока од владејачката партија посочуваат на поранешниот директор на АНБ, Виктор Димовски, инаку прв директор на Агенцијата, за кого велат дека бил долгогодишен партиски функционер на највисоките тела на СДСМ, меѓу кои на Извршниот одбор на партијата.
Во денешното соопштение, ВМРО-ДПМНЕ објави фотографии на кои, како што велат, јасно и прецизно се гледа Димовски меѓу другите членови на Извршниот одбор на СДСМ.
„Од фотографиите во прилог можеме да видиме дека освен во ИО, Димовски беше член и на нивниот Дипломатскиот совет. Партиските ангажмани на Виктор Димовски не завршуваат тука, тој учествуваше и во креирањето на политиките на СДС кој учествувал на јавни настани и на партиски дебати. СДС ја партизираше и Агенцијата за разузнавање со назначувањето на Еролд Муслиу за директор, кој злоупотребувајќи ја позицијата, агенцијата ја претвори во нивен партиски штаб. Потсетуваме и за партизацијата на УБК кога СДС за директор го постави Миле Зечевиќ, кој своевремено беше висок партиски функционер, кој потоа стана и генерален секретар (на СДСМ)“,
се вели во денешното соопштение од ВМРО-ДПМНЕ.
Затоа, велат од владејачката партија, Владата предводена од ВМРО-ДПМНЕ е одлучна да ја врати довербата на граѓаните во институции, а приоритет во таа насока, како што додаваат, се стручноста, професионалноста и компетентноста на кадрите.
„Така се постапува и при изборот на раководните кадри во безбедносните служби, кои ќе го вратат професионализмот и интегритетот во служби и истите ќе работат независно за заштита на државните интереси“,
велат од партијата.
Повикувајќи се синоќешното интервју на Христовски за емисијата „Код“ на ТВ Телма, од СДСМ утрово реагираа дека тој нема безбедносен сертификат за државна тајна и оти поднел барање за негово добивање дури откако, по партиска директива, беше назначен за директор на АНБ.
„АНБ како безбедносна служба располага со многу класифицирани информации од највисок степен до кои актуелниот директор нема право да има увид се додека не го добие сертификатот. Ова ги потврдува сите сомнежи дали Христовски воопшто ги исполнува законските услови да биде на олку висока позиција“,
велат од СДСМ.
Според опозициската партија, отворено останува и прашањето дали Христовски има вистинит документ за познавање на англискиот јазик, затоа што приложил уверение од училиште во Пловдив, Бугарија, каде што, како,што велат од СДСМ, воопшто нема ТОЕФЛ-центар за тестирање.
„Понатаму, отворено е и прашањето дали Христовски воопшто има 5 години стаж на раководни позиции согласно законските услови? Во неговата објавена биографија недостасуваат прецизни датуми за неговото раководно искуство во УБК во периодот од 2012 до 2017 година. ВМРО-ДПМНЕ брутално ги партизира институциите а со назначувањето на директор на АНБ води кон целосно уништување на безбедносните структури. СДСМ бара повлекување на Христовски и назначување нов директор на АНБ со почитување на сите прописи и законски норми“,
се наведува во соопштението на СДСМ.
Бојан Христовски беше именуван за директор на АНБ на владината седница на 16 октомври. Тој на позицијата го наследи Зарко Милошевски, кому не му беше истечен четиригодишниот мандат. Од Владата досега не излегоа со информации за причините за разрешувањето на Милошевски.