Застанувајќи во одбрана на изборот на Христовски за директор на АНБ и неговата професионалност, од владејачката партија обвинија дека додека била на власт СДСМ ја партизирала токму АНБ, но и Агенцијата за разузнавање (АР) и Управата за безбедност и контраразузнавање (УБК), на нивно чело поставувајќи партиски кадри
Откако втор ден во фокус на јавноста е смената на директори во Агенцијата за национална безбедност (АНБ) и именувањето на Бојан Христовски за нов шеф на институцијата, со реакција денеска се огласија од ВМРО-ДПМНЕ.
Застанувајќи во одбрана на изборот на Христовски и неговата професионалност, од владејачката партија обвинија дека додека била на власт СДСМ ја партизирала токму АНБ, но и Агенцијата за разузнавање (АР) и Управата за безбедност и контраразузнавање (УБК), на нивно чело поставувајќи партиски кадри.
„На чело на АНБ го поставија партискиот кадар Виктор Димовски, кој беше партиски функционер на СДС. Виктор Димовски беше член на Извршниот одбор на СДС, највисоко тело во опозициската партија и член на нивните комисии. Во Агенцијата за разузнавање СДС го има поставено Еролд Муслиу, кој во ек на најголема власт на СДС ги следеше функционерите на ВМРО-ДПМНЕ злоупотребувајќи ја службата. Муслиу правеше хајки против ВМРО-ДПМНЕ, а од Разузнавање направи партиски штаб на СДС. Да потсетиме само дека СДС за директор на УБК своевремено го имаше и Миле Зечевиќ, партиски функционер, кој потоа стана и генерален секретар“,
изјави пратеникот на ВМРО-ДПМНЕ, Бране Петрушевски.
Петрушевски го оцени за завршено времето на „шиканирање на професионалците во безбедносните служби“.