„Од основањето до денес, членови во Академијата биле припадници на македонскиот народ, но и на сите етнички заедници. Во последните петнаесетина години во составот на МАНУ членуваа четири члена со албанска етничка припадност, од кои во трите последователни раководства еден од нив ја извршуваше функцијата научеен секретар, двајца беа потпретседатели на Академијата, од кои еден е и со мандат во актуелното раководство, како и четири члена надвор од работниот состав“, се вели во соопштението на претседателството на Академијата
Во Македонија, но и во земјите во регионот и во светот постои само една национална академија што ја претставува државата во европската и во други меѓународни асоцијации на академии, се вели во денешното соопштение од претседателството на Македонската академија на науките и уметностите (МАНУ) што следи по најавите од коалицијата „Вреди“ за формирањето на академијата на науките на Албанците, чие финансирање пред неколку дена го најавија и градоначалниците на Тетово, Гостивар, Желино и Чаир.
„Постојат примери во државите во регионот и пошироко за формирање на т.н. струкови академии во рамките на соодветни стручни здруженија (Академија за архитектура, Академија за медицински науки и други), како и други научно-уметнички друштва во поголемите градови и во регионалните центри. Но, нема примери за формирање на паралелни национални академии“,
се вели во соопштението од МАНУ.
Оттаму укажуваат дека Академијата никогаш не се занимавала и неема да се занимава со дневнополитички расправи и партиски дискусии, што ја оптоваруваат нејзината редовна дејност, односно со работи што се во домен на Законодавниот дом и на државните институции.
„Од основањето до денес, членови во Академијата биле припадници на македонскиот народ, но и на сите етнички заедници. Во последните петнаесетина години во составот на МАНУ членуваа четири члена со албанска етничка припадност, од кои во трите последователни раководства еден од нив ја извршуваше функцијата научеен секретар, двајца беа потпретседатели на Академијата, од кои еден е и со мандат во актуелното раководство, како и четири члена надвор од работниот состав“,
велат од МАНУ.
Во соопштнеието се посочува дека Академијата секогаш е отворена за сите што ги исполнуваат високите научни и уметнички критериуми за членство во неа, независно од етничката, верската и каква било друга припадност, како и дека претставува столб во градењето и чувањето на идентитетот и на државноста на македонскиот народ и на деловите од другите народи што живеат во земјата.
Од коалицијата „Вреди“ вчера апелираа до сите политички партии, наместо да критикуваат, да се охрабрат и да дадат поддршка и преку инклузивна дебата да се најде правично решение за претставувањето на Албанците во највисоките академски кругови. Посочија дека Албанската академија е исклучиво научен проект, што има за цел да ја унапреди академската мисла.
„Албанските интелектуалци се систематски дискриминирани во МАНУ, тие немаат простор каде да дејствуваат. Поради тоа, ние бевме принудени да создадеме платформа што ќе овозможи развој на научната мисла“,
велат од „Вреди“.
Градоначалниците на Тетово, Гостивар, Желино и Чаир, од редовите на владејачката коалиција „Вреди“ пред неколку дена најавија финасиска поддршка за Здружението на граѓани „Академско здружение за науки и уметности на Албанците“.
На 27 јули во јавноста одекна веста дека партнерот во Владата, коалицијата „Вреди“, ќе поддржи формирање Албанска академија на науките и уметностите во земјава. Пораката дојде од Тетово, каде на средба со група професори, лидерите на „Вреди“ порачаа дека е време да се покаже интелектуалниот капацитет на Албанците во земјава.