Епицентарот на земјотресот бил на 44 километри источно од градот Малатија и на 26 километри југоисточно од Баскил
Земјотрес со јачина од 6 степени според Рихтеровата скала е регистриран утринава во источниот дел од Турција, соопшти Европскиот медитерански сеизмолошки центар (ЕМСЦ).
Епицентарот на земјотресот бил на 44 километри источно од градот Малатија и на 26 километри југоисточно од Баскил, реон што и минатата година беше погоден од силен земјотрес.
⚠Preliminary info: #earthquake (#deprem) about 20 km SW of #Doğanyol (#Turkey) 2 min ago (local time 10:46:32)❗MAGNITUDE NOT AVAILABLE YET❗Updates at:
— EMSC (@LastQuake) October 16, 2024
📱https://t.co/QMSpuj6Z2H
🌐https://t.co/AXvOM7I4Th
🖥https://t.co/wPtMW5ND1t pic.twitter.com/I0ROd639Dc
Земјотресот бил на длабочина од десет километри и засега нема информации за повредени лица и за причинета материјална штета.
Градоначалникот на Малатија, Сами Ер, како што пренесуваат турските медиуми, вели дека засега нема информации за какви било проблеми и оти теренските проверки се во тек.
„Земјотресот се почувствува силно во околните провинции и окрузи. Земјотресот предизвика краткотрајна паника кај граѓаните. Досега не е дадена официјална информација за каква било загуба на животи или сериозна финансиска штета. Екипите продолжуваат со инспекции во областа“,
информираат од Управата за вонредни ситуации на Турција (АФАД).
На веб-страницата на ЕМСЦ може да се види дека по овој земјотрес, кој е регистриран во 10:46 часот по локално време, за краток временски период имало уште десетина други потреси од кои најсилниот бил од 3 степени според Рихтеровата скала.
Минатата година во февруари земјотрес со јачина од 7,8 степени според Рихтеровата скала ја погоди југоисточна Турција во близина на границата со Сирија.
Во овој земјотрес загинаа повеќе од 50 000 луѓе во Турција и 6 000 во Сирија, а 1,2 милион луѓе останаа без покрив над главата.