Најавата за носење законско решение за правична застапеност следува откако во средата Уставниот суд одлучи да го укине „балансерот“ – алатката за вработување според национална припадност во државните институции
Министерот за здравство Арбен Таравари денеска, одговарајќи на новинарско прашање во врска со укинувањето на „балансерот“, уште еднаш го повтори ставот дека е потребен закон за правична застапеност. Тој рече дека „Вреди“ веќе го подготвува законот за, како што најави, веќе следната недела ќе се одржи и јавна дебата.
„Подготвуваме нов закон, кој се надевам дека идната недела ќе биде на јавна дебата. Ќе бидеме во координација со партнерите во коалиција. Од сите страни е констатирано дека ‘балансерот’ не функционираше како што треба“,
изјави Таравари пред почетокот на настанот „World Changers Balkan Summit“ во Филхармонија.
Тој подвлече дека е потребен закон за правична застапеност, не само за етничка категорија, туку за сите категории што се маргинализирани во општеството.
„Нам ни треба јавна дебата и синхронизација бидејќи правичната застапеност е уставна категорија и секогаш кога нешто е уставна категорија треба да постои и закон“,
додаде Таравари.
Најавата за носење законско решение за правична застапеност следува откако во средата Уставниот суд одлучи да го укине „балансерот“ – алатката за вработување според национална припадност во државните институции.
Тоа предизвика бура од реакции главно кај опозициските партии на Албанците кои оценија дека одлуката претставува тежок удар врз мултиетничката стабилност на државата.
Од Делегацијата на ЕУ во Скопје најавија дека ги очекуваат предлозите од владините партнери по укинувањето на „балансерот“ и ја нагласија важноста од континуирано спроведување на Охридскиот рамковен договор, притоа повикаа на целосно почитување на принципот на недискриминација и еднаков третман, особено во јавната администрација.