Претседателот на Владата Христијан Мицкоски ја реафирмира идејата за распуштање на Судскиот совет и на Советот на јавни обвинители. Вели дека таквата определба е вградена во програмата со која ВМРО-ДПМНЕ настапи на изборите, a тоа за него претставува обврска бидејќи огромно мнозинство граѓани гласале за такво решение.
„Јас не се откажувам од идејата, но очајно молам за предлози за да не биде довербата кај граѓаните 2% во правосудството. Ако нема доверба во правосудството, нема да има инвестиции, нема да има бизнис, нема да има пари во буџетот. Ако нема пари во буџетот, нема за здравство, нема за образование, нема за плати, нема за земјоделци, нема за пензии, нема за инфраструктура. Секој експерт што знае нешто подобро нека дојде и нека каже, само очајно молам овие 2% да направиме да бидат барем 12%. Знам дека нема да може да бидат 22, 52, 82, но барем да бидат 12%. Јас толку знам и ќе се борам за тоа што го знам. Ако некој знае подобро – нека каже, јас сум подготвен да разговараме“,
рече Мицкоски денеска во Кавадарци.
Иако е подготвен да ги прими и да размени мислење со сите што можат да понудат идеи кои се различни од неговата, тој одбива да се консултира или да чуе предлози од, како што ги нарече, „вечните“ експерти. Не ги именуваше, но беше дециден дека од нив не би примил никаква сугестија.
„Подготвен сум да разговарам со секого, секој што има некаква идеја нека дојде, подготвен сум да го сослушам. Само, да не ми се појавуваат ‘вечните’ експерти чии презимиња потоа случајно се појавуваат како нови членови на Судскиот совет. Методите на таквите вечни експерти ги знам. Ете, тие не доведоа до тие 2%“,
потенцира Мицкоски.
Тој смета дека генералната слика за правосудството ја креираат неколкумина корумпирани судии и обвинители кои им овозможуваат на одредени, како што ги нарече, политички и вистински криминалци да мислат дека се над законите.
„Тоа е систем, системот почнува од тие неколкумина, а сите ги знаме кои се. Сите во државава знаеме кои се тие во правосудството што се корумпирани. Ако се правиме при очи слепи, при уши глуви, во ред, ама не е во ред заради децата, заради идните генерации што доаѓаат“,
рече тој.
На ставот за распуштање на Судскиот и Советот на јавни обвинители се спротивстави меѓународната заедница. Според амбасадорот на ЕУ, Дејвид Гир, нема дилеми дека мора да има суштински реформи во областа на владеење на правото и судството, но не на таков начин.
Во интервјуто за „360 степени“ тој го поздрави фактот што владата е амбициозна во овој мандат да ги стави реформите во оваа сфера високо на листата приоритети и нагласи дека го разбира искушението на власта да се пристапи со т.н. „правен нихилизам“, односно да избрише сè и да почне од почеток. Тоа, како што потенцира амбасадорот, привидно изгледа атрактивно, но искуствата покажуваат дека не е најефективниот начин.
Меѓународната заедница инсистира реформите во правосудната сфера да се спроведуваат врз основа на препораките на Оценската мисија на ЕУ за работата на Судскиот совет, Извештајот за напредокот и од резултатите од скрининг-процесот.
„Извештајот на Оценската мисија содржи 40 препораки. Има уште многу други документи. Од скрининг-процесот, Извештајот за напредокот, значи има богатство достапни материјали кои покажуваат како да се оди напред. Со нетрпение очекуваме да разговараме за ова во детали“,
истакна Гир во интервјуто за „360 степени“.