Претходно денеска од Министерството за внатрешни работи информираа дека вчера бил уапсен маж од радовишкото село Али Коч, осомничен дека подметнал пожари во близина на селото, кои зафатиле дабова шума
Министерот за внатрешни работи Панче Тошковски преку социјалните мрежи упати апел до граѓаните да постапуваат совесно и одговорно и најави жестоки мерки од страна на МВР кон секој што намерно предизвикува пожари.
„Во овие тешки моменти, кога се соочуваме со катастрофални пожари, уште еднаш апелирам до сите граѓани да постапуваат совесно и одговорно, да избегнуваат активности кои можат да предизвикаат пожари и да пријавуваат сомнителни активности. Воедно, сакам да потенцирам дека МВР ќе преземе жестоки мерки кон секој што намерно предизвикува пожари и ги загрозува безбедноста и животите на нашите граѓани“,
напиша Тошковски на Фејсбук.
Претходно денеска од Министерството за внатрешни работи информираа дека вчера бил уапсен маж од радовишкото село Али Коч, осомничен дека подметнал пожари во близина на селото, кои зафатиле дабова шума. Осомничениот се товари за две кривични дела – предизвикување општа опасност и предизвикување шумски пожар. Според МВР, лицето во службен разговор со полицијата ги признало делата и е задржано во полициската станица во Радовиш.
Како што информираа денеска од Центарот за управување со кризи, вчера на територијата на државата имало вкупно 66 пожари на отворен простор од кои 12 сè уште се активни, три се под контрола, а 51 се изгаснати.
Ситуацијата со огнените стихии кои беснеат и понатаму е тешка на повеќе локации во државата, а според надлежните се користат сите расположливи ресурси за справување со пожарите, а пристигнува и меѓународна помош обезбедена со механизмот на Европската Унија за цивилна заштита.
Директорот на Центарот за управување со кризи (ЦУК), Стојанче Ангелов информираше дека на денешната седница на Управувачкиот комитет за координација и управување со системот за управување со кризи, со кој раководи министерот за внатрешни работи, Тошковски е донесена одлука да ѝ предложат на Владата да се вклучи и механизмот на НАТО за помош преку кој може да се бара помош од искусни пожарникари, иако во моментов нема таква потреба.
„НАТО-механизмот за помош ги нуди истите работи како ЕУ-механизмот. Во овој момент таква потреба немаме, но може да се појави во текот на денот. Во овој момент имаме доволен број пожарникари, војска, полиција, припадници на ’Национални шуми’, но и пожарникари доброволци што може да се вклучат во гаснењето на пожарите“,
вели Ангелов во снимена видеоизјава.
Според Ангелов, состојбата со големиот број пожари во земјава е тешка, но не е алармантна.