Американската потпретседателка Камала Харис на средбата со израелскиот премиер Бенјамин Нетанјаху рекла дека е важно како Израел се брани и додала „не можеме да го вртиме погледот од трагедиите“
Американската потпретседателка Камала Харис одржа, како што рече, „искрени и конструктивни“ разговори со израелскиот премиер Бенјамин Нетанјаху, пренесува Би-би-си.
На средбата Харис ја истакнала својата сериозна загриженост за бројот на жртви во Газа, велејќи му на Нетанјаху дека начинот на кој Израел се брани е важен.
Таа, како што пишува „Гардијан“, рекла дека Израел има право да се брани и го осудила Хамас како брутална терористичка организација која ја поттикнала војната и извршила „ужасни акти на сексуално насилство“, но јасно ставила до знаење дека е важно како Израел се брани, додавајќи „не можеме да го вртиме погледот од овие трагедии [во Газа]. Не можеме да дозволиме да не нѐ допира страдањето и јас нема да молчам“.
„Време е оваа војна да заврши“,
рекла таа по разговорот во Белата куќа.
Харис, исто така, ја нагласила потребата да се најде пат кон решение со две држави, а истовремено ги повикала Американците да бидат свесни за деликатноста на конфликтот.
За средбата со Нетанјаху, Харис информира и на својот профил на Икс, каде што пишува дека на искрен и конструктивен состанок разговарале за широк спектар на прашања, вклучително и за нејзината посветеност на безбедноста на Израел, важноста на решавање на хуманитарната криза во Газа и итната потреба да се постигне прекинот на огнот и договорот за заложниците.
Today, I had a frank and constructive meeting with Prime Minister Netanyahu about a wide range of issues, including my commitment to Israel’s security, the importance of addressing the humanitarian crisis in Gaza, and the urgent need to get the ceasefire and hostage deal done. pic.twitter.com/tgiSTPQJdL
— Vice President Kamala Harris (@VP) July 26, 2024
Нетанјаху претходно се сретна со американскиот претседател Џо Бајден, кој во неделата се повлече од кампањата за реизбор.
Состаноците на Нетанјаху во Белата куќа дојдоа еден ден откако тој одржа жесток говор пред Конгресот, ветувајќи „тотална победа“ против Хамас, додека илјадници пропалестински демонстранти протестираа пред зградата.
Нетанјаху се соочува со притисок и во Израел и на меѓународно ниво да стави крај на деветмесечната војна меѓу Израел и Газа.
Силната поддршка на Бајден за Израел налути многу пропалестински активисти, чија поддршка можеби ќе им биде потребна на демократите ако сакаат да победат на претседателските избори во ноември.