Таравари вели дека е зборувано со двајцата директори на Фондот за здравствено осигурување и оти се синхронизирани околу тоа дека треба да помине оваа позитивна листа, а до крајот на годината да се види дали може да се прошири со уште неколку лекови
Проширувањето на позитивната листа на лекови чека да биде избран нов Управен одбор на Фондот за здравство, вели министерот за здравство Арбен Таравари.
Според него, нема никаков финансиски проблем за нејзино проширување, ниту, пак, се спорни деветте лекови кои е најавено дека ќе се најдат на неа.
„Нема никаков проблем, има пари, само чекаме да се избере новиот Управен одбор кој се уште не е комплетиран. Од наша страна е испратено пред две недели со согласност од Фондот. Штом ќе има прва седница Управниот одбор на Фондот, позитивната листа ќе ја промовираме заедно со директорот на Фондот за здравство. Нема голема финансиска импликација“,
рече Таравари кој денеска беше во посета на Детската клиника каде се промовираше нов дел на невролошки амбуланти и се активираше апарат сонограф, што е за ехо на глава на помали деца.
Таравари најави дека до крајот на годината можно е да има уште еден зафат за проширување на позитивната листа на лекови.
Вчера директорот на ФЗО Сашо Клековски изјави дека очекува за десетина дена да се знае дали ќе има проширување на позитивната листа со девет нови лекови, бидејќи во моментот не е прашање дали има или нема пари за девет лекови и оти министерката за финансии истакнала дека во буџетот постојат многу дупки, кои доправа треба да ги детектираат, како, на пример, дека во Фондот имало средства за плати за нецела година.
Таравари за ваквата изјава рече дека е зборувано со двајцата директори на Фондот за здравствено осигурување и оти се синхронизирани околу тоа дека треба да помине оваа позитивна листа, а до крајот на годината да се види дали може да се прошири со уште неколку лекови.
Клековски вчера рече дека во моментот се прави проценка колкави се дупките во повеќе подрачја за заедно со ребалансот, со новите средства, да се направи проценка кои се здравствени потреби можат да се задоволат до крајот на годината. За 2025 година, Клековски додаде дека се размислува разумно во насока следното гледање на позитивната листа да не биде мало дотерување, туку да биде посуштинска, посодржинска промената.