Пријавата, како што информираат од Антикорупциска, била поднесена од Управата за финансиско разузнавање. Се бара проверка за имотот на владиниот генерален секретар, кој наводно не е пријавен во неговиот анкетен лист, како и имотот кој е заведен како подарок
Државната комисија за спречување на корупцијата (ДКСК) отвори предмет во врска со имотот на генералниот секретар на Владата, Игор Јанушев, потврдиле од Комисијата за МИА.
Пријавата, како што информираат оттаму, била поднесена од Управата за финансиско разузнавање. Се бара проверка за имотот на владиниот генерален секретар, кој наводно не е пријавен во неговиот анкетен лист.
Антикорупционерите ќе вршат проверка и на имотот кој Јанушев го навел како подарок.
На страницата на ДКСК во делот информации за имотната состојба, кај Јанушев се наведува дека поседува стан од 165 квадратни метри вреден 20 милиони денари, стекнат како подарок.
Опозицискиот СДСМ неколку дена прашува како генсекот на Владата успеал на подарок да добие земјиште вредно 325 илјади евра во Општина Центар. Од партијата денеска излегоа и со прашање како овој имот на Јанушев е поврзан со имотот на министерот за внатрешни работи Панче Тошковски, за кого, исто така, обвинија дека поседува стан и деловни простории во зграда во Центар, за кои не е познато дали ги пријавил во анкетнитот лист.
Ако се провери имотната состојба на Тошковски, според податоците на страницата на ДКСК, тој поседува стан од 146 метри квадратни и деловен простор од 46 квадрати во Центар.
Тошковски и Јанушев денеска негираа дека поседуваат имот кој не го пријавиле во анкетниот лист, односно имот кој е стекнат под сомнителни околности, како што тврди СДСМ.