Што се однесува до уставното име на државата, Писонеро истакна дека ЕУ веќе кажала оти жали поради тоа што „некои македонски лидери“ не го употребуваат
Европската Унија ќе соработува со новата влада во остварувањето напредок во суштинските реформи со цел земјата да напредува на европскиот пат, ние им честитавме на премиерот Христијан Мицкоски и на министрите, а Северна Македонија мора да го искористи моментумот кој постои за проширувањето, изјави портпаролката на Европската комисија за соседска политика, проширување и меѓународни партнерства, Ана Писонеро.
„Мислам дека пораката е многу јасна, Северна Македонија мора да го искористи моментумот кој постои за проширувањето со цел да продолжи решително на нејзиниот пат кон ЕУ. Мислам дека сите сте крајно свесни за тоа што Европскиот совет јасно го кажа дека го очекува од Северна Македонија, а тоа секако се однесува и на уставните амандмани за кои Северна Македонија се обврза да ги спроведе за да може да продолжи по својот пат“,
истакна Писонеро во одговор на новинарско прашање за ставот на ЕК околу изјавата на Мицкоски дека нема да прифати промена на Уставот.
Што се однесува до уставното име на државата, Писонеро истакна дека ЕУ веќе кажала оти жали поради тоа што „некои македонски лидери“ не го употребуваат.
„Тоа е нешто што е договорено со Преспанскиот договор и јасно е дека сите страни треба да ги почитуваат одредбите од Договорот и да го имплементираат со добра волја. Тоа имаме да го кажеме“,
истакна Писонеро.