Од Министерството за здравство попладнево за МИА потврдиле дека денеска од страна на Таравари се разрешени 10 економски директори, како и медицинскиот директор на гостиварската болница
Меѓу сменетите организациски директори, како што потврди Таравари претходно во изјава за медиумите, е и Бесија Иљази од Клиниката за токсикологија, која изминатиот период беше во фокусот на јавноста во врска со спорни вработувања
Еден ден по преземањето на функцијата министер за здравство Арбен Таравари денеска во изјава за медиумите потврди дека се сменети организациските директори на десетина клиники во рамки на Клиничкиот центар „Мајка Тереза“.
Таравари, одговарајќи на новинарски прашања за време на денешната посета на Здравствениот дом Скопје, рече дека за нов директор на Клиниката за токсикологија е назначен Андон Чибишев, а утре, како што додаде, нов директор треба да добие и Клиниката за онкологија.
Министерот за здравство информираше дека нов директор на Клиниката за неврологија е поранешниот министер за здравство Фатмир Меџити.
„Професор Чибишев ќе биде новиот директор на Токсикологија. Исто така се надевам дека утре ќе го назначиме и новиот директор на Онкологија бидејќи таму решението за в.д. директорката е поминато кон средината на јуни. На Неврологија нов директор е поранешниот министер за здравство д-р Фатмир Меџити“,
изјави Таравари.
За директорската позиција на Онкологија, министерот кажа дека сè уште не донел одлука и дека е во консултација со колегите од оваа клиника.
Меѓу сменетите организациски директори, како што потврди Таравари, е и Бесија Иљази од Клиниката за токсикологија, која изминатиот период беше во фокусот на јавноста во врска со спорни вработувања. И покрај утврдените неправилности од страна на Државниот санитарен и здравствен инспекторат (ДСЗИ), претходникот на Таравари, односно министерот за здравство во техничката влада, Илир Демири, не ја разреши. Со Токсикологија изминатиот период раководеше само Иљази откако Демири на 14 мај го разреши медицинскиот директор д-р Данил Петровски.
Прашан дали се утврдени неправилности во работата на Иљази, новиот министер за здравство денеска одговори:
„Најверојатно да, службите го имаат тоа. Секако дека ние одлучивме веднаш да се разреши и да се назначи нов директор. Нема веќе да има економски директори, тоа е целта“, рече Таравари.
рече Таравари.
Дополнително, во одговор на новинарско прашање, министерот рече дека наскоро ќе биде предложен закон со кој ќе се укине позицијата економски или организациски директор на клиниките.
„Многу скоро ќе предложам нов закон за здравствена заштита во којшто нема да има економски директори во сите установи. Каде што има, ако не се лажам повеќе од 100 вработени, така е законот, ќе предвидиме да има само професионален еден директор на клиника или болница или јавна здравствена установа“,
рече Таравари.
Кажа оти се надева дека набргу ќе бидат синхронизирани и систематизациите и ќе се донесе одлука за повторно спојување на Клиничкиот центар во една установа.
„Истото важи и за здравствените домови и за болниците. Зборувам за помалите градови каде што има општа болница и здравствен дом, ќе бидат споени во едно што ќе се вика општа болница. Нема да има двајца, тројца, четворица директори, туку само еден, како што беше порано“,
изјави Таравари.
Во однос на разрешувањата на организациските директори, од Министерството за здравство попладнево за МИА потврдиле дека денеска од страна на Таравари се разрешени 10 економски директори, како и медицинскиот директор на гостиварската болница.
Како што информирале од Министерството за државната новинска агенција, разрешени се економските директори на Универзитетската клиника за токсикологија; Универзитетскиот стоматолошки клинички центар „Свети Пантелејмон“; Универзитетската клиника за психијатрија; Универзитетската клиника за физикална медицина и рехабилитација; Универзитетската клиника за неврологија; Универзитетската клиника за хирургија на лице, вилици и врат – максилофацијална хирургија; Универзитетската клиника за дерматологија; Универзитетската клиника за ревматологија; Универзитетската клиника за ендокринологија, дијабетес и метаболични нарушувања, како и на Психијатриската болница „Скопје“.
Разрешен е и медицинскиот директор на Општата болница „Ферид Мурад“ во Гостивар.