За средбата со Столтенберг, Муцунски рече дека била позитивна и срдечна, на која се потврдиле заложбите на новата влада, како што вели, поврзани со нашето членство во НАТО, како поддршката на политиката за одбрана и одвраќање и континуирана поддршка за Украина
Мораме да бидеме одговорна земја, како членка на НАТО, со што ја потврдуваме посветеноста на исполнување на обврската за издвојување средства во буџетот за одбрана на ниво на најмалку два проценти од националниот БДП. Ова денеска од Брисел го порача министерот за надворешни работи и надворешна трговија Тимчо Муцунски по средбата со генералниот секретар на НАТО, Јенс Столтенберг, посочувајќи дека се наоѓаме во сложен геополитички контекст на континентот.
„Не е прашање дали треба, туку мораме да ги продолжиме таквите инвестиции. Тоа е во интерес на Алијансата на која сме член, но сметаме дека тоа е и во наш национален интерес“,
рече тој.
За средбата со Столтенберг, Муцунски рече дека била позитивна и срдечна, на која се потврдиле заложбите на новата влада, како што вели, поврзани со нашето членство во НАТО, како поддршката на политиката за одбрана и одвраќање и континуирана поддршка за Украина.
Муцунски и Столтенберг разговарале и за претстојниот самит на НАТО во Вашингтон, на кој треба да се одбележат 75 години од формирањето на Алијансата, како и дека премиерот Христијан Мицкоски ќе ја предводи нашата делегација.
„Планираме активно учество каде што ќе се носат одлуки поврзани со иднината на Алијансата. Ние секако ќе бидеме активен чинител во придонесување на тие идни политики“,
вели шефот на дипломатијата.
Според него, покрај 100-процентната усогласеност на земјава со заедничката надворешна и безбедносна политика на ЕУ, дополнително еднакво значајно е тоа што како мала држава го прави и како членка на НАТО.
„Заштитата на поредокот на меѓународното јавно право е многу значајна. Тоа што се случува во Украина од таа гледна точка, но и од безбедносна гледна точка не смее да дозволи кога било да се повтори. Нашите заложби како политички така и безбедносни ќе продолжат во насока на поддршка на Украина и ставање на што е возможно побрз крај на тој тажен воен конфликт“,
вели тој.
Дводневната работна посета на Брисел министерот Муцунски ќе ја продолжи со средби со претставници на Европската Унија.