Директно упатените закани кон дел од судиите, информираат од Уставен, се поврзани со постапување по конкретен предмет од страна на Судот
Претседателот на Уставниот суд, Дарко Костадиновски, денеска поднел пријава до Министерството за внатрешни работи (МВР) поради закани по животот и безбедноста кои биле упатени до дел од судиите. Директно упатените закани, информираат од Уставен, се поврзани со постапување по конкретен предмет од страна на Судот.
„Претседателот Костадиновски најостро ги осудува ваквите закани упатени до судиите истакнувајќи дека во едно демократско општество вакви и слични закани претставуваат напад врз интегритетот на Уставниот суд, но и директен притисок врз независното и самостојно одлучување на сите судии“,
се наведува во соопштението на Уставниот суд.
Од Уставен изразуваат очекување дека надлежните органи професионално и навремено ќе постапат за случајот имајќи ја предвид, како што посочуваат, сериозноста на упатените јавни закани и повици за насилство.
Пред повеќе од еден месец, тогаш сè уште актуелната претседателка на Уставниот суд, Добрила Кацарска, во полиција пријави евентуално загрозување на сигурноста откако на нејзиното приватно паркинг-место во близина на нејзиното живеалиште беа пронајдени импровизиран кревет и забоден кујнски нож.
Неколку дена подоцна Кацарска на прес-конференција кажа дека од позиција на претседателка на Уставниот суд трпела закани неколку години наназад, но дека сè до случајот во нејзината гаража не ги пријавувала оти сметала дека се работи за изолирани случаи и не сакала со нив да ги оптоварува јавноста и органите на прогонот.