Заменик-министерот за внатрешни работи Мунир Каралоглу вели дека веќе почнале со утврдувањата на штетите и оти Јавното обвинителство ја презело истрагата за утврдување на причината за пожарот
Најмалку единаесет лица се загинати, а десетици се повредени во пожар кој прво горел на ниска вегетација, а потоа од ветер се проширил во неколку села на југоистокот на Турција.
Турскиот министер за здравство Фахретин Коџа денеска објави дека има 11 смртни случаи и 78 повредени лица, од кои пет морале да бидат примени на интензивна нега.
„Единаесет лица ги загубија животите, а 78 лица се повредени од пожарот што избувна вчера вечерта во населбата Коксалан и селото Јазчичи во областа Чинар во Дијарбакир и селата Јуџебаг и Јеткинлер во областа Мазидаги во Мардин. Поради овие пожари во селата на границата на Дијарбакир и Мардин, пет пациенти во моментов се на интензивна нега во Дијарбакир и четири од нив се интубирани. Еден пациент е на интубиран третман во Шанлиурфа. Вкупниот број на пациенти кои се лекуваат во нашите болници е шест“,
изјавил Коџа.
Diyarbakır’ın Çınar ilçesinin Köksalan mahallesi ve Yazçiçeği köyü ile Mardin’in Mazıdağı ilçesi Yücebağ ve Yetkinler köyünde dün akşam meydana gelen yangın sebebi ile 11 kişi hayatını kaybetti, 78 kişi yangından etkilendi. Hayatını kaybedenlere Allah’tan rahmet diliyorum,…
— Dr. Fahrettin Koca (@drfahrettinkoca) June 21, 2024
Пожарот, кој под влијание на ветерот брзо се проширил во подножјето на планината Дибек, и се шири кон руралните населби Јагбасан и Карасавџи е причина за евакуирање на жителите од овие делови.
Турските власти информираат и дека за време на интервенцијата две лица кои учествувале во гаснењето се повредени, а по укажаната итна помош биле хоспитализирани и нивната состојба е добра.
Во пожарот настрадале и стотици животни.
Заменик-министерот за внатрешни работи Мунир Каралоглу вели дека веќе почнале со утврдувањата за штетите.
„Тука се сите институции и организации на државата. Јавното обвинителство ја презеде истрагата за утврдување на причината за пожарот. Засега немаме информации. Ќе ги споделиме кога обвинителство ќе ја заврши истрагата“,
вели тој.
И министерот за правда Јилмаз Тунч вели дека властите започнале истрага за причината.
Коџа вели дека пожарот е изгаснат во текот на ноќта и оти противпожарните служби продолжуваат со напорите за разладување на опожареното земјиште.
Во меѓувреме, во северозападна Турција, пожарникарите работат на гаснење на пожарот во близина на градот Ајваџик во провинцијата Чанаккале, објави државната новинска агенција Анадолу.
Оваа провинција изминатава недела се соочи со неколку пожари поради високите температури и силниот ветер.