Откако се вратија на власт во август 2021 година, талибанците им забранија на девојчињата и жените да го продолжат своето образование надвор од основното училиште
Одбележувајќи илјада дена откако на девојчињата во Авганистан им беше забрането да одат на училиште, агенцијата за деца на ОН, УНИЦЕФ ги повика талибанците да им дозволат на девојчињата да се вратат на училиште.
„За 1,5 милиони девојчиња, систематското исклучување не само што е јасно прекршување на нивното право на образование туку резултира со намалени можности и го оштетува нивното ментално здравје“,
рече директорката на УНИЦЕФ, Кетрин Расел.
Расел апелираше до талибанците да им дозволат на девојчињата да се вратат на училиште, истакнувајќи дека ниту една земја не може да напредува ако половина од населението е необразовано.
„Ја повикувам и меѓународната заедница да ги поддржи овие девојки на кои им сме потребни повеќе од кога било“,
рече таа.
Откако се вратија на власт во август 2021 година, талибанците им забранија на девојчињата и жените да го продолжат своето образование надвор од основното училиште.
Меѓутоа, во некои делови од земјата тие посетуваат верски училишта и училишта за акушерки и медицински сестри.
Талибанската влада не е меѓународно призната.