Се очекува на настанот да присуствуваат повеќе аџии од минатата година, кога повеќе од 1,8 милиони луѓе присуствувале на аџилакот, но се најавува и дека ќе се надминат новоата пред пандемијата, кога на аџилак присуствувале повеќе од 2,4 милиони луѓе. Меѓу аџиите има и 4 200 Палестинци од окупираниот Западен Брег кои во Мека пристигнале на почетокот на месецот
Повеќе од еден и пол милион муслимански верници деновиве пристигнале во Саудиска Арабија да присуствуваат на овогодинешниот аџилак во Мека и Медина, настан кој официјално треба да почне во петок, пренесува „Еконоктајмс“.
Се очекува на настанот да присуствуваат повеќе аџии од минатата година, кога повеќе од 1,8 милиони луѓе присуствувале на аџилакот, но се најавува и дека ќе се надминат нивоата пред пандемијата, кога на аџилак присуствувале повеќе од 2,4 милиони луѓе. Меѓу аџиите има и 4 200 Палестинци од окупираниот Западен Брег кои во Мека пристигнале на почетокот на месецот.
Палестинците од Појасот Газа не можат да патуваат во Саудиска Арабија на аџилак оваа година, поради војната меѓу Хамас и Израел.
Според теолошкото објаснување за аџилакот, секој аџија треба седум пати во обратен правец од стрелките на часовникот да ја заобиколи Ќаба, зградата во облик на коцка, која е свето место за муслиманите, треба да го целива „црниот камен“ на аголот на Ќаба, седум пати да го помине патот помеѓу двете планини Аш Шафа и Ал Марвах, да се напие вода од изворот Замзам, да оди на рамнините на планината Арафат, да бдее стоејќи и да фрла камења во ритуалното каменување на ѓаволот. По завршувањето на овие ритуали, аџиите се бричат, изведуваат ритуал на животинска жртва и го слават четиридневниот фестивал на жртвата.
Инаку, аџиите имаат посебно код на облекување, односно мажите носат дводелна облека и едниот дел ги покрива нозете, а другиот се префрла преку рамото. Жените носат бела облека и шамија. Ваквиот начин на облекување претставува чистота и еднаквост.
Аџилакот се одржува еднаш годишно во Мека и Медина, најсветото место за муслиманите. Секој возрасен муслиман што е во можност треба да го изврши петдневниот ритуал барем еднаш во текот на својот живот. Истовремено, тоа е и најголемиот собир на луѓе во светот, на кој присуствуваат повеќе милиони верници.