Османи се заблагодарил за континуираната поддршка од САД за реформските процеси, борбата против корупцијата и демократскиот развој на Северна Македонија. Тој ја нагласил и посветеноста на земјава во спроведувањето на активностите кои произлегуваат од Стратешкиот дијалог меѓу Северна Македонија и САД
Министерот за надворешни работи Бујар Османи денеска на маргините на неформалниот состанок на НАТО во Прага се сретнал со државниот секретар на САД, Ентони Блинкен, соопштија од МНР.
На средбата, како што информираа од МНР, се разговарало за актуелните настани во Северна Македонија, при што Османи брифирал за неопходноста од продолжување на евроатлантскиот пат на земјата, како клуч за стабилноста.
„Евроинтегративниот процес, посветеноста кон функционалната мултиетничка демократија и почитувањето на трите договори се неопходни за зачувување на стабилноста на земјата и регионот“,
нагласил Османи, стои во соопштението.
Тој се заблагодарил за континуираната поддршка од САД за реформските процеси, борбата против корупцијата и демократскиот развој на Северна Македонија. Тој ја нагласил и посветеноста на земјава во спроведувањето на активностите кои произлегуваат од Стратешкиот дијалог меѓу Северна Македонија и САД, кој Османи и Блинкен, се додава во соопштението, заеднички го лансираа во Вашингтон во јуни 2022 година.
Како што соопштија од МНР, соговорниците се осврнале и на руската воена агресија во Украина истакнувајќи дека како стратешки партнери и НАТО сојузници стоиме обединети во поддршката за украинскиот народ.